سپر اسٹار رجنی کانت کے مداحوں کے لیے بڑی خبر سامنے آئی ہے۔ ان کی انتہائی متوقع ایکشن فلم ’’جیلر ۲‘‘ کی ریلیز کی تاریخ باضابطہ طور پر کنفرم کر دی گئی ہے۔ فلم ۱۵؍ اکتوبر ۲۰۲۶ء کو دنیا بھر کے سنیما گھروں میں ریلیز ہوگی۔ فلم کے پروڈیوسر سن پکچرز نے حال ہی میں ریلیز کی تاریخ کی دوبارہ تصدیق کرتے ہوئے تاخیر سے متعلق تمام افواہوں کو ختم کر دیا ہے۔

 ’’جیلر ۲‘‘ جمعرات۱۵؍ اکتوبر کو سنیما گھروں میں دستک دے گی۔ فلم کی ریلیز  دسہرہ کے تہوار  کے آس پاس رکھی گئی ہے، جس سے اسے طویل ویک اینڈ اور تہوار کے دوران بڑے پیمانے پر ناظرین تک پہنچنے کا موقع ملے گا۔  فلم کی ریلیز کو لے کر گزشتہ کئی ماہ سے مختلف قیاس آرائیاں جاری تھیں۔ پہلے اگست اور پھر ستمبر میں ریلیز کی خبریں سامنے آئی تھیں، لیکن اب پروڈکشن ہاؤس نے حتمی تاریخ ۱۵؍ اکتوبر مقرر کر دی ہے۔

یہ بھی پڑھئے:’’کیا ہم مسلمان ہیں؟‘‘ جاوید اختر نے ۸؍ سالہ فرحان اختر کے بچپن کا دلچسپ واقعہ سنایا

 گزشتہ دنوں سوشل میڈیا اور بعض رپورٹس میں دعویٰ کیا گیا تھا کہ ’’جیلر ۲‘‘ کے کچھ حصوں کی دوبارہ شوٹنگ یعنی  ری شوٹس  کی وجہ سے فلم کی ریلیز آگے بڑھ سکتی ہے۔ تاہم، فلم کے میکرز نے ان افواہوں کو مسترد کر دیا ہے۔ تازہ اعلان میں واضح کیا گیا ہے کہ فلم ۱۵؍ اکتوبر کو ہی ریلیز ہوگی  اور پوسٹ پروڈکشن کا کام بھی منصوبے کے مطابق جاری ہے۔  فلم کے لیے ایک نیا پروموشنل پوسٹر بھی جاری کیا گیا ہے، جس میں رجنی کانت اپنے مشہور ایکشن انداز میں نظر آ رہے ہیں۔
’’جیلر۲‘‘ میں رجنی کانت ایک بار پھر  مٹھوویل پانڈیان  کے کردار میں نظر آئیں گے۔ پہلی فلم میں ان کے کردار کو شائقین نے زبردست پسند کیا تھا اور ’’ٹائیگر‘‘ کے طور پر ان کی شخصیت فلم کی سب سے بڑی خاص باتوں میں شامل رہی تھی۔ فلم ۲۰۲۳ء میں ریلیز ہونے والی ’’جیلر‘‘ کا سیکوئل ہے، جس نے باکس آفس پر زبردست کامیابی حاصل کی تھی۔ اب سیکوئل سے بھی شائقین کو اسی طرح کے ایکشن، کامیڈی، ڈرامے اور رجنی کانت کے مخصوص اسٹائل کی توقع ہے۔

یہ بھی پڑھئے:لوگ کیوں نہیں سمجھتے کہ ہندوستان اور پاکستان کرکٹ صرف ایک میچ ہے:وسیم اکرم

 ’’جیلر ۲‘‘ کی ہدایت کاری  نیلسن دلیپ کمار  کر رہے ہیں۔ پہلی ’’جیلر‘‘ کی طرح سیکوئل کی کہانی اور ہدایت کاری بھی نیلسن کے ذمے ہے۔ فلم کی موسیقی ایک بار پھر ’’انیرودھ روی چندر‘‘ دے رہے ہیں، جس سے پہلی فلم کے میوزیکل انداز کو بھی برقرار رکھنے کی امید ہے۔ آفیشل کریڈٹس کے مطابق فلم کوسن پکچرز پروڈیوس کر رہا ہے۔  ’’جیلر ۲‘‘ میں پہلی فلم کے کئی اہم اداکار اپنے کردار دوبارہ ادا کرتے نظر آئیں گے۔ ان میں شیوا راج کمار، رمیا کرشنن، مرنا، ونا یاکن  اور  یوگی بابو  شامل ہیں۔ اس کے علاوہ سیکوئل میں  ودیا بالن، سورج ونجاراموڈو، جتن سرنا  اور  متھن چکرورتی  جیسے اداکار بھی اہم کرداروں میں شامل ہیں۔ فلم میں رجنی کانت کے ساتھ مختلف زبانوں اور فلمی صنعتوں سے تعلق رکھنے والے فنکاروں کی موجودگی اسے ایک بڑے پین انڈیا پروجیکٹ کی شکل دیتی ہے۔