اُتر پردیش میں سیاسی اور سماجی کارکنان کے خلاف سخت قوانین کے اطلاق کے خلاف جامعہ ملیہ اسلامیہ کے طلبہ نے جمعرات کو یہاں اتر پردیش بھون کا گھیراؤ کرنے کی کوشش کی لیکن پولیس نے انہیں حراست میں لے لیا۔

 نئی دہلی : اُتر پردیش میں سیاسی اور سماجی کارکنان کے خلاف سخت قوانین کے اطلاق کے خلاف جامعہ ملیہ اسلامیہ کے طلبہ نے جمعرات کو یہاں اتر پردیش بھون کا گھیراؤ کرنے کی کوشش کی لیکن پولیس نے  انہیں حراست میں لے لیا۔جامعہ کوآرڈی نیشن کمیٹی کی جانب سے یوپی میں شہریت ترمیمی قانون کے خلاف احتجاج کرنے والےسماجی کارکنوں پر غیر قانونی سرگرمیوں کی  روک تھام سے متعلق قانون (یو اے پی اے)، قومی سلامتی قانون (این ایس اے)،  پبلک سیفٹی ایکٹ (پی ایس اے) اور ملک سے غداری جیسے قوانین  کا اطلاق کئے جانے کے   یوپی بھون کا گھیراؤ کرنے کی  اپیل کی گئی تھی۔
  مظاہرین طلبہ نے یہاں ا ین ایس اے کے تحت گرفتار کئے گئے  ڈاکٹر کفیل خان کی رہائی کا پُر زور مطالبہ کیا ۔ واضح رہے کہ ڈاکٹر کفیل کو۱۲؍دسمبر کو علی گڑھ مسلم یونیورسٹی میں مبینہ اشتعال انگیز تقریر کے الزام میں ممبئی سے گرفتار کیا گیا تھا۔ عدالت  نے ڈاکٹر کفیل کی ضمانت منظور کر لی تھی لیکن اس کے بعد انہیں این ایس اے کے تحت گرفتار کر لیا گیا۔