امریکی ٹیکنالوجی کمپنی مائیکروسافٹ آئندہ ہفتے ملازمین کی ایک نئی بڑی تعداد کو فارغ کرنے کا اعلان کر سکتی ہے، جس کے تحت دنیا بھر میں ۵۵۰۰؍ سے زائد ملازمتیں متاثر ہونے کا اندیشہ ظاہر کیا جا رہا ہے۔

 امریکی ٹیکنالوجی کمپنی مائیکروسافٹ آئندہ ہفتے ملازمین کی ایک نئی بڑی تعداد کو فارغ کرنے کا اعلان کر سکتی ہے، جس کے تحت دنیا بھر میں  ۵۵۰۰؍ سے زائد ملازمتیں متاثر ہونے کا اندیشہ ظاہر کیا جا رہا ہے۔ 
 بزنس انسائیڈر کی رپورٹ کے مطابق یہ چھانٹیاں کمپنی کی عالمی افرادی قوت کے ۵ء۲؍ فیصد سے کم حصے پر مشتمل ہوں گی۔ یہ اقدام سیلز، کنسلٹنگ اور ایکس باکس (Xbox) گیمنگ ڈویژن سمیت مختلف شعبوں کو متاثر کر سکتا ہے۔ 

یہ بھی پڑھئے:فیفا ورلڈ کپ:بلجیم نے سینیگال کی امیدوں پر پانی پھیردیا

رپورٹ کے مطابق ۳۰؍ جون ۲۰۲۵ء تک مائیکروسافٹ کے دنیا بھر میں تقریباً ۲؍ لاکھ ۲۸؍ ہزار مستقل ملازمین تھے۔ اگر تخفیف  کا حجم ۵ء۲؍ فیصد سے کم رہا تو متاثرہ ملازمین کی تعداد تقریباً  ۵؍ ہزار ۷۰۰؍سے کم ہوگی۔ اگرچہ مائیکروسافٹ نے تاحال ان اطلاعات کی باضابطہ تصدیق نہیں کی، تاہم ذرائع کا کہنا ہے کہ کمپنی اپنے کاروباری ڈھانچے کو مزید مؤثر بنانے اور اخراجات میں کمی کے لیے تنظیمِ نو پر غور کر رہی ہے۔  
رپورٹس کے مطابق مائیکروسافٹ مصنوعی ذہانت (اے آئی) اور کلاؤڈ کمپیوٹنگ میں بڑے پیمانے پر سرمایہ کاری جاری رکھے ہوئے ہے۔ کمپنی دیگر اے آئی پر مبنی مصنوعات کی توسیع کے ساتھ ساتھ دنیا بھر میں نئے ڈیٹا سینٹرز بھی قائم کر رہی ہے تاکہ بڑھتی ہوئی طلب کو پورا کیا جا سکے۔  

یہ بھی پڑھئے:فلم ’’آوارہ پن ‘‘:امال ملک کی کمپوزنگ پرپاکستانی گلوکار مصطفیٰ زاہد کا رد عمل

ماہرین کے مطابق یہی وجہ ہے کہ مائیکروسافٹ سمیت کئی بڑی ٹیکنالوجی کمپنیاں اپنے وسائل روایتی کاروباری شعبوں سے منتقل کر کے مصنوعی ذہانت، سافٹ ویئر ڈیولپمنٹ اور کلاؤڈ انفرا اسٹرکچر پر مرکوز کر رہی ہیں۔ دوسری جانب اطلاعات ہیں کہ مائیکرو سافٹ کے گیمنگ ڈویژن ایکس باکس میں بھی مزید تبدیلیاں متوقع ہیں۔ 
حال ہی میں ایکس باکس کنسولز کی قیمتوں میں بھی اضافہ کیا گیا تھا۔  اس سے قبل بھی رپورٹس سامنے آئی تھیں کہ کمپنی مارکیٹنگ بجٹ میں کمی اور اضافی ملازمین کی چھٹنی پر غور کر رہی ہے، جبکہ یہ مائیکروسافٹ کی جانب سے حالیہ برسوں میں ملازمین کی تعداد کم کرنے کا پہلا اقدام نہیں ہوگا۔  جولائی ۲۰۲۵ء میں بھی کمپنی نے اپنی عالمی افرادی قوت کا تقریباً ۴؍فیصد کم کرنے کا اعلان کیا تھا، جس سے انجینئرنگ سمیت متعدد شعبے متاثر ہوئے تھے۔