اتر پردیش کے کانپور میں فوڈ ڈپارٹمنٹ نے تقریباً ۱۰؍ ہزار کلو کھجور ضبط کی ہیں جن کی میعاد ۲۰۲۲ء میں ختم ہو چکی تھی۔ حکام کے مطابق پیکٹوں پر ۲۰۲۶ء کی نئی ایکسپائری اسٹیکرز چسپاں کر کے انہیں مارکیٹ میں فروخت کرنے کی تیاری کی جا رہی تھی۔

کانپور کے علاقے نوبستہ میں ایک گودام پر کارروائی کی گئی ہے جو رجنیش ٹریڈرس سے منسوب بتایا جا رہا ہے۔ یہاں سے فوڈ ڈپارٹمنٹ نے تقریباً ۱۰؍ ہزار کلو کھجوریں ضبط کی، جن کی مالیت ۵۰؍ لاکھ روپے سے زائد بتائی جا رہی ہے۔ ابتدائی جانچ میں انکشاف ہوا کہ ان کھجوروں کی اصل میعاد ۲۰۲۲ء میں ختم ہو چکی تھی، تاہم پیکٹوں پر ۲۰۲۶ء کی نئی ایکسپائری تاریخ کے اسٹیکرز لگائے جا رہے تھے۔

لیبارٹری جانچ اور گرفتاری
رپورٹس کے مطابق فوڈ سیفٹی حکام نے ۹؍ نمونے لیبارٹری ٹیسٹنگ کے لیے بھیج دیے ہیں تاکہ معیار اور صحت کے پہلوؤں کا جائزہ لیا جا سکے۔ ایک ملزم کو حراست میں لے کر پوچھ گچھ کی جا رہی ہے۔ حکام کا کہنا ہے کہ اگر لیبارٹری رپورٹ میں خلاف ورزی ثابت ہوئی تو متعلقہ قوانین کے تحت سخت کارروائی کی جائے گی۔

In UP`s Kanpur, food department seized 10k kilos of dates worth over ₹50 lakhs which had expired in 2022. New stickers showing expiry date in 2026 were being put on the packets containing expired dates to be sold in the market. pic.twitter.com/yPukZNndYs

— Piyush Rai (@Benarasiyaa) February 22, 2026

عوامی صحت کا معاملہ
ماہرین کے مطابق میعاد ختم خوراک کو نئی تاریخ لگا کر فروخت کرنا نہ صرف دھوکہ دہی ہے بلکہ عوامی صحت کے لیے سنگین خطرہ بھی بن سکتا ہے۔ سیفٹی اینڈ اسٹینڈرڈز ایکٹ کے تحت ایسی سرگرمیوں پر بھاری جرمانے اور قید کی سزا ہو سکتی ہے۔
فوڈ ڈپارٹمنٹ نے کہا ہے کہ گودام کے ریکارڈ اور سپلائی چین کی بھی جانچ کی جا رہی ہے تاکہ معلوم ہو سکے کہ آیا ایسی مصنوعات پہلے ہی مارکیٹ میں فروخت کی جا چکی ہیں یا نہیں۔ حکام نے شہریوں سے اپیل کی ہے کہ وہ خریداری کے دوران مصنوعات کی میعاد ضرور چیک کریں اور کسی بھی مشتبہ سرگرمی کی اطلاع دیں۔