کانگریس صدر ملکارجن کھرگے اور لوک سبھا میں قائد حزبِ اختلاف راہل گاندھی نے خود کیلئے پیچھے کی نشستیں مختص کئے جانے کی وجہ مسلسل دوسری مرتبہ لال قلعے میں منعقدہ یومِ آزادی کی تقریب میں شرکت نہیں کی، جس پر بی جے پی نے کانگریس کو تنقید کا نشانہ بنایا۔ دوسری جانب وزیراعظم نریندر مودی نے قوم سے خطاب میں ہندوستان کی معاشی ترقی کا ذکر کرتے ہوئے کہا کہ ملک ’فریجائل فائیو‘ میں شمار ہونے سے نکل کر دنیا کی بڑی معیشتوں میں سب سے تیزی سے ترقی کرنے والی معیشت بن گیا ہے۔

کانگریس صدر ملکارجن کھرگے اور لوک سبھا میں قائد حزبِ اختلاف راہل گاندھی نے سنیچر، ۱۵؍ اگست کو مسلسل دوسری مرتبہ لال قلعے میں وزیراعظم نریندر مودی کی زیرِ قیادت منعقدہ یومِ آزادی کی تقریب میں شرکت نہیں کی۔ کانگریس کے دونوں سینئر رہنماؤں کی ۸۰؍ ویں یومِ آزادی کی تقریب سے غیرحاضری پر سیاسی تنازع کھڑا ہوگیا اور بھارتیہ جنتا پارٹی (بی جے پی) نے اس فیصلے پر کانگریس کو تنقید کا نشانہ بنایا۔

یہ بھی پڑھئے: یومِ آزادی کے موقع پر کاکروچ جنتا پارٹی کی ’اسکول ٹھیک کرو‘ مہم کا آغاز کرے گی

راجیہ سبھا میں قائد حزبِ اختلاف اور کابینہ وزیر کے مساوی درجہ رکھنے والے کھرگے کے لیے تقریب میں دوسری یا تیسری قطار میں نشست مختص کی گئی تھی۔ پارٹی کے اعلیٰ ذرائع کے مطابق نشست کا انتظام کھرگے کے لیے موزوں نہیں تھا، کیونکہ اس کے باعث انہیں تقریب کے مقام تک پہنچنے کے لیے پیدل چلنا پڑتا۔ توقع ہے کہ کھرگے دن کے بعد کانگریس ہیڈکوارٹر میں ترنگا لہرائیں گے۔

کانگریس کی قیادت نے ۲۰۲۵ء میں بھی لال قلعے پر منعقدہ یومِ آزادی کی تقریب میں شرکت نہیں کی تھی۔ نشستوں کے انتظام کا معاملہ اس سے قبل ۲۰۲۴ء کی یومِ آزادی تقریب کے دوران بھی تنازع کا باعث بنا تھا۔ لوک سبھا میں قائد حزبِ اختلاف اور کابینہ وزیر کا درجہ رکھنے والے راہل گاندھی کو دوسری آخری قطار میں نشست دی گئی تھی، جس پر کانگریس نے اعتراض کیا تھا۔ اس وقت وزارتِ دفاع نے وضاحت کی تھی کہ نشستوں کا انتظام راہل گاندھی کو نشانہ بنا کر نہیں کیا گیا تھا بلکہ تقریب میں اگلی قطاریں ان اولمپین کھلاڑیوں کے لیے مختص کی گئی تھیں جنہیں تقریب کے دوران اعزاز سے نوازا جانا تھا۔

یہ بھی پڑھئے: ’۲۰۴۷ء تک ہندوستان کو ترقی یافتہ ملک بنانا ہے‘، لال قلعے سے وزیر اعظم کا خطاب

ہم کبھی ’فریجائل فائیو‘ میں شامل تھے: وزیراعظم مودی
دوسری جانب وزیراعظم نریندر مودی نے سنیچر کو لال قلعے کی فصیل سے قوم سے خطاب کرتے ہوئے ہندوستان کی معاشی تبدیلی کو اجاگر کیا اور کہا کہ گزشتہ ۱۲؍ برسوں کے دوران ملک ’فریجائل فائیو‘ معیشتوں میں شمار ہونے سے نکل کر دنیا کی بڑی معیشتوں میں سب سے تیزی سے ترقی کرنے والی معیشت بن گیا ہے۔ مودی نے اپنے مسلسل ۱۳؍ ویں یومِ آزادی خطاب میں کہا، ’’ہم کبھی ’فریجائل فائیو‘ میں شمار کیے جاتے تھے۔ تاہم صرف ۱۲؍ برسوں کے اندر ہندوستان دنیا کی بڑی معیشتوں میں سب سے تیزی سے ترقی کرنے والی معیشت بن کر ابھرا ہے۔‘‘