صدر جمہوریہ ، وزیر اعظم ، چیف جسٹس اورمختلف پارٹیوںکے لیڈروںنےالمناک حادثہ کے مہلوکین اور متاثرین کے تئیں اظہار ہمدردی کے ساتھ دعا بھی کی

احمد آباد سے لندن  جانے والا ایئر انڈیا کا طیا رہ ۱۲؍جون کی دوپہر پرواز کے فوراً بعد ہی حادثہ کا شکار ہو گیا ۔ اس طیارہ میں پائلٹ اور دیگر عملہ کے اہلکاروں سمیت۲۴۲؍افراد سوار تھے۔ خبر رساں ایجنسی ایسو سی ایٹیڈ پریس نے اپنی ایک رپورٹ میں بتایا ہے کہ طیارہ میں سوار کوئی بھی زندہ نہیں بچ سکا۔  ایسو سی ایٹیڈ پریس نے یہ جانکاری پولیس کمشنر جی ایس ملک کے بیان کا حوالہ دیتے ہوئے دی  ۔ رپورٹ کے مطابق پولیس کمشنر جی ایس ملک نے بتایا  ’’ایسا لگ رہا ہے کہ طیارہ حادثہ میں کوئی بھی زندہ نہیں بچا ہے۔ چونکہ طیارہ رہائشی علاقہ میں حادثہ کا شکار ہوا تھا، اس لئے کچھ مقامی لوگ بھی مارے گئے ہوں گے ۔‘‘
 اس حادثہ کے بعد وزیر اعظم مودی، مرکزی وزیر برائے شہری ہوابازی رام موہن نائیڈو، کانگریس پارلیمانی پارٹی کی چیئرپرسن سونیا گاندھی، لوک سبھا میں حزب اختلاف کے قائد راہل گاندھی، چیف جسٹس بی آر گوئی  اورمختلف پارٹیوں کے کئی سیاسی لیڈران نے تعزیتی پیغام میں متاثرہ کنبوں کے تئیں اپنی ہمدردی ظاہر کی ہے۔ 
 احمد آباد میں پیش آئے حادثہ پر وزیر اعظم مودی نے کہا ’’اس حادثہ نے ہمیں ششدر اور غمزدہ کر دیا ہے۔ یہ الفاظ سے پرے دل دہلا دینے والا حادثہ ہے۔ اس غمناک وقت میں میری ہمدردیاں سبھی متاثرین کے ساتھ ہیں۔ میں وزراء اور افسران کے رابطے میں ہوں۔ سبھی لوگ متاثرین کی مدد کے لیے کام کر رہے ہیں ۔ سپریم کورٹ کے چیف جسٹس بی آر گوئی اور ان کے ساتھی ججوں نے گجرات کے احمد آباد میں جمعرات کو ہونے والے المناک طیارہ حادثے سے متاثرہ خاندانوں کے تئیں گہری تعزیت کا اظہار کیا۔عدالت عظمیٰ کی طرف سے جاری کردہ ایک بیان میں کہا گیا ہے کہ چیف جسٹس اور ان کے ساتھی ججوں نے رجسٹری کے حکام کے ساتھ حادثے سے متاثرہ خاندانوں سے گہری تعزیت کا اظہار کیا۔
 چیف جسٹس نے احمد آباد کے بی جے میڈیکل کالج اور سول ہاسپٹل (جہاں طیارہ حادثہ ہوا) کے مریضوںکیلئے بھی اپنی تشویش کا اظہار کیا ہے۔جسٹس گوئی نے کہا’’ہماری تعزیت اور دعائیں اس مشکل وقت میں ان کے ساتھ ہیں۔ ‘‘
 صدرجمہوریہ دروپدی مرمو نے کہا کہ وہ احمد آباد طیارہ حادثے کے بارے میں جان کر کافی پریشان ہوئیں۔ ایکس پر ایک پوسٹ میں، مرمو نے کہا’’میں احمد آباد میں ہوائی جہاز کے المناک حادثے کے بارے میں جان کر بہت افسردہ ہوں۔ یہ ایک دل دہلا دینے والی آفت ہے۔ میری دعائیں متاثرہ افراد کے ساتھ ہیں۔ ناقابل بیان غم کی اس گھڑی میں قوم ان کے ساتھ کھڑی ہے۔‘‘
طیارہ حادثہ کے بارے میں جان کر صدمہ ہوا: نائیڈو
 شہری ہوا بازی کے وزیر رام موہن نائیڈو نے جمعرات کو کہا کہ تمام ہنگامی ایجنسیوں کو احمد آباد میں طیارہ حادثہ کی جگہ پر بھیج دیا گیا ہے اور وہ خود صورتحال پر نظر رکھے ہوئے ہیں ۔  نائیڈو نے `ایکس پر کہا’’احمد آباد میں ہوائی جہاز کے حادثے کے بارے میں جان کر صدمہ پہنچا۔  میں ذاتی طور پر صورت حال کی نگرانی کر رہا ہوں اور تمام ہوا بازی اور ہنگامی ایجنسیوں کو فوری اور مربوط کارروائی کرنے کی ہدایت دی ہے ۔‘‘ انہوں نے کہا کہ ریسکیو ٹیمیں تعینات کر دی گئی ہیں اور اس بات کو یقینی بنانے کے لیے تمام کوششیں کی جا رہی ہیں کہ جائے وقوعہ پر طبی امدادی امداد فراہم کی جائے۔انہوں نے کہا کہ میری تعزیت اور دعائیں طیارے میں سوار تمام لوگوں اور ان کے اہل خانہ کے ساتھ ہیں۔
ممتا بنرجی کا اظہار رنج و غم 
 مغربی بنگال کی وزیر اعلیٰ ممتا بنرجی نے جمعرات کو احمد آباد طیارے کے حادثے پر گہرے رنج و غم کا اظہار کیا۔ممتا بنرجی نے اپنے `ایکس ہینڈل پر کہا’’آج احمد آباد میں ایئر انڈیا کے طیارے کے حادثے کی خبر سن کر میں گہرے صدمے میں ہوں۔ یہ ہم سب کے لیے سب سے افسوسناک خبر ہے۔ میں متاثرین کے اہل خانہ سے تعزیت کا اظہار کرتی ہوں۔ ہم زندہ بچ جانے والوں کے بارے میں معلومات کا بے صبری سے انتظار کر رہے ہیں اور سب کے بچنے کی  پرارتھنا کر رہے ہیں۔‘‘
 انہوں نے کہا’’لندن جانے والے طیارے کے ٹیک آف کے دوران ہونے والے حادثے نے سب کو چونکا دیا ہے اور بہت دکھ پہنچایا ہے۔ اگرچہ ہمیں صحیح اعداد و شمار نہیں معلوم، لیکن میڈیا رپورٹس بتاتی ہیں کہ طیارے میں ۲۴۲؍مسافر سوار تھے۔ میں اس وقت بھگوان سے پرارتھنا کر رہی ہوں۔‘‘
 وزیر اعلیٰ کے بھتیجے اور ترنمول کانگریس کے جنرل سیکریٹری ابھیشیک بنرجی نے کہا کہ وہ احمد آباد میں ایئر انڈیا کے ہوائی جہاز کے المناک حادثے سے بہت غمزدہ ہیں۔ انہوں نے اس کی تفصیلی اور شفاف تحقیقات کا مطالبہ کیا ہے ۔ انہوں نے کہا’’ اس دل دہلا دینے والے واقعے میں اپنے پیاروعزیزوںکو کھونے والے کنبوں سے میری دلی تعزیت ہے۔ حکومت کی طرف سے اس سانحہ کی وجوہات جاننے کے لیے مکمل اور شفاف تحقیقات کرائی جائیں۔‘‘ انہوں نے زخمیوں کی جلد صحت یابی اور سوگواروں کیلئےصبر کی  پرارتھنا کی۔‘‘
سونیا، کھرگے نے طیارہ حادثے پر گہرے دکھ کا اظہار کیا
 کانگریس پارلیمانی پارٹی کی لیڈر سونیا گاندھی، کانگریس صدر ملکارجن کھرگے، لوک سبھا میں اپوزیشن لیڈر راہل گاندھی اور پارٹی جنرل سیکریٹری پرینکا گاندھی واڈرا نے احمد آباد طیارہ حادثہ پر گہرے رنج و غم کا اظہار کیا اور سوگوار خاندانوں کے تئیں دلی تعزیت کا اظہار کیا۔جمعرات کو اپنے تعزیتی پیغام میں سونیا گاندھی نے کہا ’’میں احمد آباد میں ہوائی جہاز کے المناک حادثے سے گہرےصدمے میں ہوں ۔ میری تعزیت مسافروں اور عملے کے اہل خانہ کے ساتھ ہے۔ جو مناظر سامنے آئے ہیں وہ انتہائی دردناک ہیں۔ پورا ملک سوگ میں ڈوبا ہوا ہے اور دعائیں مانگ رہا ہے۔‘‘کھرگے نے کہا’’ ایئر انڈیا کے طیارے کے حادثے کے بارے میں جان کر بہت دکھ ہوا۔یہ دل دہلا دینے والا ہے۔ مسافروں، پائلٹ اور عملے کے اہل خانہ سے ہماری دلی تعزیت اور دعائیں ہیں۔‘‘ راہل گاندھی نے کہا’’احمد آباد ایئر انڈیا کا حادثہ دل دہلا دینے والا ہے۔میری تعزیت اس ناقابل یقین مشکل لمحے میں ان میں سے ہر ایک کے ساتھ ہے ۔ انتظامیہ کی طرف سے فوری طور پر بچاؤ اور راحت کی کوششیں بہت ضروری ہیں - ہر زندگی کی اہمیت ہے،  کانگریس کارکنوں کو زمینی سطح پر مدد کے لیے ہر ممکن کوشش کرنی چاہئے۔‘‘ پرینکا گاندھی نے کہا ’’ایئر انڈیا کے طیارے میں سوار مسافروں اور عملے کے اراکین کے اہل خانہ سے میری گہری تعزیت ہے۔‘‘کانگریس  کے آفیشل `ایکس پیج پر ایک پوسٹ میں احمد آباد میں ہولناک ہوائی جہاز کے حادثے کو انتہائی افسوسناک قراردیاگیا ہے اورمہلوکین کی آتما کی شانتی کیلئے دعا کی گئی ہے۔