مدینہ صحت مرکز کے مطابق مخصوص وارڈ میں ڈائیلاسیس کے۱۳؍جدید ترین یونٹس فراہم کیے گئے ہیں۔

سعودی عرب میں مدینہ منورہ کے شاہ فہد جنرل اسپتال کی انتظامیہ نے گردوں کے امراض میں مبتلا عازمین کےلئے خصوصی طورپر ڈائیلاسیس سینٹر قائم کردیا ہے۔ سعودی میڈیا کے مطابق شاہ فہد اسپتال میں گردوں کے امراض کے لیے مخصوص وارڈ میں عازمین کے لیے علیحدہ سیکشن قائم کردیا گیا ہے تاکہ وہ عازمین جنہیں گردوں کے امراض کی شکایت ہے انہیں ڈائیلاسیس کے لئے کسی قسم کی دشواری نہ ہو۔ مدینہ صحت مرکز کے مطابق بیمار عازمین کے لیے مخصوص کئےجانے والے وارڈ میں ڈائیلاسیس کے ۱۳؍جدید ترین یونٹس فراہم کیے گئے ہیں جن کے ذریعہ یومیہ ۲۶؍ ڈائیلاسیس سیشنز کیے جاسکتے ہیں۔ 
 رپورٹس کے مطابق صحت مرکز کی جانب سے غیرملکی حج مشنز سے مستقل بنیادوں پر رابطہ رکھا جاتا ہے تاکہ بیمار عازمین کا ڈاٹا حاصل کیا جائے اور انہیں ضرورت پڑنے پر بروقت ڈائیلاسیس کی سہولت مہیا کی جاسکے۔ واضح ہو کہ سعودی عرب میں وزارت حج و عمرہ کا کہنا ہے کہ بدھ ۲۳؍ ذو القعدہ تک بیرون ملک سے آنے والے عازمین حج کی تعداد ۷؍ لاکھ ۱۷؍ ہزار ۴۴؍سے زائد ہوچکی ہے۔ 
 وزارت کا اپنے بیان میں کہنا تھا کہ اب تک جاری کئے جانے والے حج ویزوں میں سے ۴۹؍ فیصد افراد مملکت پہنچ چکے ہیں۔ وزارت کے مطابق عازمین حج تین اہم راستوں کے ذریعے مملکت میں داخل ہوئے۔ سب سے زیادہ عازمین ہوائی راستے سے آئے ہیں جن کی تعداد ۶؍لاکھ ۹۱؍ ہزار ۴۲۹؍ ہے۔ سمندری راستوں کے ذریعہ آنے والے عازمین کی تعداد ۲۸۲۱؍ رہی جبکہ زمینی راستوں سے تقریباً ۲۲؍ہزار ۷۹۴؍ عازمین آئے۔ وزارت کا کہنا تھا کہ یہ سب ایک مربوط نظام کے تحت انجام دیا گیاہے۔