جمعرات کو رائے گڑھ میں واشی ناکہ کے قریب سڑک سے گزر رہے ایک ’پِک اَپ‘ ٹیمپو میں اچانک آگ لگ گئی۔ اس ٹیمپو میں ۸؍ گیس سلنڈر رکھے ہوئے تھے جن میں یکے بعد دیگر دھماکے ہونے سے پورے علاقے میں خوف و ہراس پھیل گیا   اور کافی دیر تک ٹریفک نظام متاثر رہا۔ ڈرائیور کی حاضردماغی سے حادثہ کی شدت کم ہوگئی  ۔ خوش قسمتی سے اس حادثہ میں کوئی زخمی نہیں ہوا۔

یہ حادثہ جمعرات کو دن کے وقت پیش آیا جب ’چھوٹا ہاتھی‘ کہلانے والے ایک ٹیمپو میں گیس سلنڈر لے جایا جارہا تھا اور اس میں اچانک آگ لگ گئی۔ پولیس کے مطابق آتشزدگی کا احساس ہوتے ہی ڈرائیور نے ٹیمپو سڑک کے کنارے کھڑا کردیا اور وہاںسے فرار ہونے کے بجائے بہادری کا مظاہرہ کرتے ہوئے پہلے گاڑی میں رکھے آگ بجھانے کے آلے سے آگ پر قابو پانے کی کوشش کی لیکن آگ بڑھتی گئی جس پر اس نے جہاں تک ممکن ہوسکا چند گیس سلنڈر گاڑی سے نکال کر دور پھینک دیئے اور وہاں سے گزرنے والی گاڑیوں کو اشارے سے دور رہنے کو کہا۔  بعدازیں گیس سلنڈر ایک کے بعد ایک پھٹنے لگے  ۔دھماکے کی آواز کئی کلو میٹر دور تک سنی گئی اور کافی دور تک  شعلے اٹھتے دکھائی دیئے ۔اطلاع ملنے پر فائر بریگیڈ نے وہاں پہنچ کر آگ پر قابو پالیا۔