ٹی ایم سی کے باغی اراکین   کے گروپ کا  غیرمعروف ’’نیشنلسٹ سٹیزن  پارٹی آف انڈیا‘‘ (این سی پی آئی)  میں انضمام کا فیصلہ  قانونی پیچیدگیوں کا شکار ہے۔مذکورہ پارٹی کا لوک سبھا میں کوئی رکن نہیں ہے۔ یعنی لوک سبھا میں  اس کی قانون ساز پارٹی موجود نہیں ہے جس میں باغی گروپ کا انضمام ہوسکتا تھا۔ اس لئے اسپیکر اوم برلا  اس ضمن میں قانونی صلاح ومشورہ  پر غور کررہے ہیں۔  بہرحال وہ پارلیمنٹ کے مانسون اجلاس سے قبل اس پر فیصلہ کرلیںگے۔ 

 

 

 

یہ رائے اس لیے حاصل کی جا رہی ہے تاکہ اگر اسپیکر کے فیصلے کو عدالت میں چیلنج کیا جائے تو وہ عدالتی جانچ پرکھرا اتر سکے۔ اس بیچ لوک سبھا کے سابق سکریٹری جنرل اور آئینی ماہر پی ڈی ٹی آچاری نے آئین کے دسویں شیڈول کی شق۴؍ کا حوالہ دیتے ہوئے کہا  ہےکہ کوئی سیاسی جماعت ہی دوسری سیاسی جماعت میں ضم ہو سکتی ہے۔

 

 

انہوں نے زور دیکر کہا کہ ’’ محض اراکین پارلیمان یا  اسمبلی کا انضمام نہیں ہوسکتا۔‘‘ خبر رساں ایجنسی پی ٹی آئی سے گفتگو میں  انہوں  نے بتایاکہ’’ اگر کسی سیاسی جماعت کی قیادت دوسری جماعت میں ضم ہونے کا فیصلہ کرے تو اس کے اراکین پارلیمان  واسمبلی اس کی توثیق کر سکتے ہیں، لیکن صرف اراکین خود کسی دوسری جماعت میں ضم نہیں ہو سکتے کیونکہ یہی آئینی تقاضا ہے۔‘‘الیکشن کمیشن کے ایک سابق افسر، جو سیاسی جماعتوں سے متعلق معاملات دیکھتے رہے ہیں، نے ٹی ایم سی کے باغی اراکین کے این سی پی آئی میں ضم ہونے کے منصوبے کو’’نیا تجربہ‘‘قرار دیا  جس کا ذکر نہ دَل بدلی قانون میں ہے اور نہ ہی عوامی نمائندگی ایکٹ میں۔ ٹی ایم سی کا باغی گروپ جس ’’این سی پی آئی‘‘ میں ضم ہونے کا ارادہ رکھتا ہے ا س نے بطور سیاسی پارٹی  جنوری۲۰۲۳ء خود کو  رجسٹر ڈکرایا تھا۔ الیکشن کمیشن کے ریکارڈ کے مطابق اس کا پتہ مغربی بنگال کے ضلع ہاوڑہ کے شنکرائل علاقے میں واقع ایک عمارت ہے۔