فیفا ورلڈ کپ ۲۰۲۶ء میں جاپان کے شائقین نے ایک بار پھر اپنی منفرد ثقافت اور ذمہ داری کا مظاہرہ کرتے ہوئے میچ کے بعد اسٹیڈیم کی صفائی کی۔ ان کا یہ عمل کھیل کے ساتھ احترام، نظم و ضبط اور سماجی شعور کی شاندار مثال سمجھا جاتا ہے۔

جاپان نے فیفا ورلڈ کپ ۲۰۲۶ء میں اپنا پہلا میچ اتوار (۱۴؍جون) کو امریکہ کے شہر ڈلاس کے اسٹیڈیم میں نیدرلینڈز کے خلاف کھیلا اور ایک حیران کن۲۔ ۲؍ کی برابری حاصل کی۔ جہاں کھلاڑیوں نے اپنی شاندار کارکردگی سے مداحوں کے دل جیت لئے، وہیں شائقین نے بھی میزبان ملک کے احترام میں میچ کے بعد اسٹیڈیم کی صفائی کرکے اپنی ذمہ داری نبھائی۔ جاپانی شائقین اس بات کیلئے مشہور ہیں کہ وہ اپنی ٹیم کے شریک ہونے والے مختلف مقابلوں میں میچ کے بعد اپنے بیٹھنے کے علاقے کو صاف کرتے ہیں، اور فیفا ورلڈ کپ بھی ان کی اسی ثقافت کی ایک اور مثال ہے۔ فیفا نے بھی اتوار کے میچ کے بعد شائقین کی صفائی کرتے ہوئے ایک ویڈیو شیئر کی، جس میں ایک مداح نے اس عمل کی وجہ بھی بیان کی۔ 

The reason Japan fans clean the stadium after each game. Respect. 🤝🇯🇵 pic.twitter.com/o9qJUOLefY

— FIFA (@FIFAcom) June 15, 2026

جاپانی شائقین میچ کے بعد اسٹیڈیم کیوں صاف کرتے ہیں؟
فیفا کے آفیشیل ایکس اکاؤنٹ پر شیئر کی گئی ویڈیو میں شائقین کو اپنے حصے کا کچرا نیلے تھیلوں میں جمع کرتے ہوئے دیکھا جا سکتا ہے۔ اس دوران ایک مداح نے اس روایت کی وضاحت کرتے ہوئے کہا:’’یہ ہماری ثقافت ہے۔ یہ ہر چیز کے احترام سے متعلق ہے، کھلاڑیوں کا احترام، دوسرے شائقین کا احترام، اور اسٹیڈیم کا احترام۔ ہمیں یہاں آنے کا اعزاز حاصل ہوا ہے، اس لئے ہم گندگی پھیلا کر اسے چھوڑنا نہیں چاہتے۔ یہی وجہ ہے کہ ہم ایسا کرتے ہیں۔ ‘‘

یہ بھی پڑھئے: فیفا ورلڈ کپ :برازیل کا ریکارڈ پاش پاش: جرمنی نے عالمی ریکارڈ بنایا

یہ سوچ ایک مشہور جاپانی کہاوت’’Tatsu tori ato wo nigosazu‘‘ کی عکاسی کرتی ہے، جس کا لفظی ترجمہ ہے:’’پرندہ اپنے پیچھے کچھ نہیں چھوڑتا۔ ‘‘ اس کہاوت کا اصل مفہوم ہے: ’’جگہ کو ویسا ہی چھوڑو جیسا تم نے اسے پایا تھا۔ ‘‘
یہ نظریہ بچپن ہی سے لوگوں میں راسخ کیا جاتا ہے۔ جاپان کے اسکولوں میں بچے خود اپنی کلاسوں اور راہداریوں کی صفائی کرتے ہیں۔ ۲۰۱۸ءمیں بی بی سی سے گفتگو کرتے ہوئے اسکاٹ نارتھ نے کہا:’’بچپن بھر مسلسل یاد دہانیوں کے باعث یہ رویے آبادی کے ایک بڑے حصے کی عادت بن جاتے ہیں۔ ‘‘

یہ بھی پڑھئے: والد کے احترام میں یاسین ایاری نے گول کرنے کا جشن نہیں منایا

فیفا ورلڈ کپ ۲۰۲۶ءمیں جاپان کا شیڈول
(۱)جاپان اپنا دوسرا گروپ ایف میچ۲۰؍ جون کو تیونس کے خلاف ایسٹیڈیو مونٹیری میں کھیلے گا۔ 
(۲)اس کے بعد ۲۵؍جون کو گروپ مرحلے کے آخری میچ میں سویڈن کا سامنا دوبارہ ڈلاس اسٹیڈیم میں ہوگا۔ 
(۳)نیدرلینڈز کے خلاف۲۔ ۲؍ کے ڈرا کے بعد جاپان اس وقت گروپ میں سویڈن کے بعد دوسرے نمبر پر ہے۔