شدت پسندوں نے لاوے پورہ میں تعینات سی آر پی ایف کی ایک روڈ اوپننگ پارٹی پر فائرنگ کردی
EPAPER
Updated: March 26, 2021, 9:36 AM IST | Agency | Srinagar
شدت پسندوں نے لاوے پورہ میں تعینات سی آر پی ایف کی ایک روڈ اوپننگ پارٹی پر فائرنگ کردی
سری نگر کے مضافاتی علاقہ لاوے پورہ میں جمعرات کو جنگجوئوں کے ایک حملے میں سینٹرل ریزرو پولیس فورس (سی آر پی ایف) کے ایک افسر سمیت ۲؍ اہلکار شہید جبکہ دیگر۲؍ زخمی ہو گئے۔سرکاری ذرائع نے بتایا کہ جنگجوئوں نے لاوے پورہ میں تعینات سی آر پی ایف کی ایک روڈ اوپننگ پارٹی (آر او پی) پر نزدیک سے فائرنگ کی جس کے نتیجے میں چار اہلکار زخمی ہوئے۔
انہوں نے بتایا کہ زخمیوں میں سے سی آر پی ایف افسر اسپتال پہنچائے جانے سے قبل ہی دم توڑ گیا جبکہ دیگر ۳؍ کو فوری طور پر سری نگر کے فوجی اسپتال منتقل کیا گیا جہاں ایک اور اہلکار زخموں کی تاب نہ لاتے ہوئے دم توڑ گیا۔
سی آر پی ایف نے مہلوکین کی شناخت۵۴؍ سالہ سب انسپکٹر مانگا دیب برما ساکن تری پورہ اور۳۶؍ سالہ کانسٹیبل/ ڈرائیور اشوک کمار ساکن ہماچل پردیش کے طور پر کی ہے۔زخمیوں کی شناخت کانسٹیبل جگن ناتھ رائے ساکن مغربی بنگال اور کانسٹیبل ناظم علی کے طور پر کی گئی ہے۔موقع پر پہنچنے والے ایک سی آر پی ایف عہدیدار نے نامہ نگاروں کو بتایا کہ حملہ آورگلی کوچوں سے گزر کر فرار ہوئے ہیں۔انہوں نے مزیدکہا کہ `وہ پوری منصوبہ بندی کر کے آئے تھے۔ کشمیر زون پولیس کے انسپکٹر جنرل وجے کمار نے بھی حملے میں ایک افسر سمیت سی آر پی ایف کے دو جوانوں کے مارے جانے اور دیگر تین کے زخمی ہونے کی تصدیق کی ہے۔