میرابھائندر میونسپل کارپوریشن نے اپنے فائر بریگیڈ کی استعداد میں اضافہ کرتے ہوئے ۱۶ ؍فائر بائک اپنے بیڑے میں شامل کی ہے۔

میرابھائندر میونسپل کارپوریشن نے اپنے فائر بریگیڈ کی استعداد میں اضافہ کرتے ہوئے ۱۶ ؍فائر بائک اپنے بیڑے میں شامل کی ہے۔گزشتہ روز میرا بھائندر میونسپل کارپوریشن کے صدر دفتر میں میونسپل کمشنر اور شہر کے موجودہ منتظم سنجے شرپت کاٹکر کے ہاتھوں سے ان فائر بائیکس کا افتتاح کرکے بیڑے میں شامل کیا گیا۔ 
میرابھائندرمیونسپل کارپوریشن کے محکمہ اطلاعات و تعلقات عامہ کی جانب سے فراہم کردہ معلومات کے مطابق۳۵۰ ؍سی سی انجن کی استعداد رکھنے والی ۱۶؍ فائر بائیکس خرید کر فائر بریگیڈ کی کارکردگی بہتر بنانے کی کوشش کی گئی ہےجن میں سے ہر بائیک میں ۳۵ ؍لیٹر کا واٹر ٹینک ہوتا ہے ان بائیک پر واٹر مسٹ ٹیکنالوجی نصب کی گئی ہے ۔ اس ٹیکنالوجی سے ہوا کو ٹھنڈا کر کے آگ بجھانے میں مدد ملے گی۔ ان موٹر سائیکل پر نوزل گن کے ساتھ ۲۰ ؍میٹر طویل ہوزریل دستیاب ہے اور جیٹ کی لمبائی ۱۰ ؍میٹر رکھی گئی۔ زیادہ دباؤ سے پمپ سے پانی کا اخراج کی صلاحیت ۸ ؍سے ۹ ؍میٹر فی منٹ ہوگی۔ مذکورہ فائر بائیکس کو چھوٹے اور ابتدائی مرحلے کی آگ بجھانے کیلئے استعمال کیا جائے گا ۔علاوہ ازیں ان موٹر سائیکلوں کی مدد سے تنگ گلیوں میں جائے حادثہ پر بروقت پہنچنا ممکن ہوگا۔