بی جےپی کے یوم تاسیس میںانہیں’’کلیدی ایجنڈہ ‘‘ قرار دیا، نفاذ کی کوششوں کا حوالہ دیا، آسام میں ریلی سے خطاب کیا، کانگریس پر پاکستان کی زبان بولنے کا الزام لگایا

وزیر اعظم نریندر مودی نے پیر کو  بی جے پی کے یوم تاسیس کے پروگرام سے آن لائن خطاب کرتے ہوئے کہا کہ  پارٹی کے۲؍اہم ایجنڈوں’’ یکساں سول کوڈ ‘‘(یو سی سی) اور ’’ون نیشن، ون الیکشن‘‘ کو نافذ کرنے کا مشن ابھی جاری ہے  ۔ یو سی سی کے ملک گیر نفاذ کا اشارہ دیتے ہوئے وزیراعظم کہا کہ اس سلسلے میں سنجیدہ بات چیت  اور مثبت پیش رفت ہوئی ہے۔
  بی جےپی ۴۷؍ ویں یوم تاسیس میں مودی نے کہاکہ’’ہمارا مشن ابھی جاری ہے۔ یکساں سول کوڈ، ’ون نیشن، ون الیکشن‘ اور دیگر امور پر ملک میں سنجیدہ بات چیت ہو رہی ہے اور ہم نے ان محاذوں پر بڑی پیش رفت حاصل کی ہے۔‘‘انہوں نے کہا کہ بی جے پی کا مقصد ملک کو ترقی یافتہ اور خود کفیل بنانا ہے اور وہ اسی سمت میں آگے بڑھتی رہے گی۔  واضح رہے کہ اتراکھنڈ میں بی جےپی سرکار نے یو سی سی نافذ کردیا ہےجبکہ گجرات کی اسمبلی نے بھی اسے پاس کیا ہے۔ آسام کی انتخابی مہم میں زعفرانی پارٹی نے یوسی سی کے نفاذ کا وعدہ کیا ہے۔ مودی کےمثبت پیش رفت کے دعوے کو اسی پس منظر میں دیکھا جارہاہے۔