مہاراشٹر اسٹیٹ روڈ کارپوریشن (ایس ٹی )کو ملک کی نمبر ون ٹرانسپورٹ تنظیم بنانے کے عزم کا اظہار کرتے ہوئے ریاستی وزیر ٹرانسپورٹ پرتاپ سرنائک نے کہا ہے کہ ان کا مقصد ایس ٹی کے ذریعے سے مسافروں کو اعلیٰ معیار کی سہولیات فراہم کرنا اور ملازمین کو مالی طور پر مستحکم بنانا ہے۔

مہاراشٹر اسٹیٹ روڈ کارپوریشن (ایس ٹی )کو ملک کی نمبر ون ٹرانسپورٹ تنظیم بنانے کے عزم کا اظہار کرتے ہوئے  ریاستی وزیر ٹرانسپورٹ پرتاپ سرنائک نے کہا ہے کہ ان کا مقصد ایس ٹی کے ذریعے سے مسافروں کو اعلیٰ معیار کی سہولیات فراہم کرنا اور ملازمین کو مالی طور پر مستحکم بنانا ہے۔ ’یشونت ناٹیا مندر‘ میں منعقد ایس ٹی کی۷۷؍ ویں سالگرہ کے موقع پر اختراعی اسکیموں کے آغاز اور گورو ایوارڈ تقریب سے خطاب کر رہے تھے۔ اس موقع پر ایس ٹی کارپوریشن کے نائب صدر و منیجنگ ڈائریکٹر ڈاکٹر مادھو کوسیکر، تمام سینئر افسران اور ملازمین موجود تھے۔
 اس موقع پر وزیر سرنائک نے کہا کہ گزشتہ ۷۷؍ سال سے ایس ٹی ریاست کے تمام طبقات کو مسلسل خدمات فراہم کر رہی ہے، چاہے گرمی ہو، آندھی یا بارش، اور شہروں سے لے کر دیہاتوں تک لوگوں کو پہنچانے میں پیش پیش رہی ہے۔ انہوں نے اعتماد ظاہر کیا کہ ایس ٹی اپنی صد سالہ تقریبات بھی مکمل کرے گی کیونکہ اسے مہاراشٹر کے عوام کی بھرپور حمایت حاصل ہے۔انہوں نے کہا کہ ملک میں بہت کم ادارے ایسے ہیں جو ۷۵؍ سال سے زائد عرصے سے قائم ہیں، اور ایس ٹی کارپوریشن ان میں سے ایک ہے۔ آج۷۷؍ سال بعد بھی ریاست کی سماجی زندگی میں ایس ٹی کی اہمیت برقرار ہے۔ عوام کی تائید سے یہ ادارہ مستقبل میں بھی ترقی کی راہ پر گامزن رہے گا۔ 
 اس تقریب میں ’’ہمارے لیے بس‘‘ نامی  تنظیم کی جانب سے تیار کردہ کافی ٹیبل بک ایس ٹی  نامہ، جس میں ایس ٹی کے گزشتہ۷۷؍ برسوں کا سفر تصویری انداز میں پیش کیا گیا ہے، معززین کے ہاتھوں جاری کی گئی۔ اس کے ساتھ ساتھ بہترین کارکردگی پر افسران کو ’’صدر گولڈ میڈل‘‘ سے نوازا گیا جن میں دھولیہ-نندربار ڈویژن کے کنٹرولر وجے گیتے، ساکری ڈپو کے ڈپو منیجر سنیل مہالے، مکینیکل انجینئر پنکج مہاجن، جالنہ ڈویژن کے مکینیکل انجینئر سریندر ٹنڈالے اور سندھودرگ ڈویژن کے سول انجینئر اکشے کینکرے شامل ہیں۔ ان تمام کو گولڈ میڈل سرٹیفکیٹ دیے گئے۔
 نئی رعایتی اسکیم جولائی سے نافذ ہوگی
 ریاستی وزیرٹرانسپورٹ  سرنائک نے اعلان کیا کہ جو مسافر دور دراز سفر کیلئے  پیشگی ریزرویشن کریں گے، انہیں ٹکٹ کی قیمت میں ۱۵؍ فیصد رعایت دی جائے گی، تاکہ آف پیک سیزن میں مسافروں کی تعداد میں اضافہ کیا جا سکے۔ یہ اسکیم جولائی سے نافذ کی جائے گی اور ای-شیونری جیسی بسوں سے سفر کرنے والے اس سے مستفید ہوں گے۔انہوں نے مزید کہا کہ ایس ٹی ملازمین کے تبادلے اب مکمل طور پر آن لائن کیے جائیں گے تاکہ اس عمل میں شفافیت برقرار رہے اور تبادلے سنیارٹی کی بنیاد پر ہوں۔ اب تمام بین علاقائی، انٹرا ریجنل اور انٹرا ڈیپارٹمنٹل ٹرانسفرز آن لائن ہوں گے۔ اسکیم کی نقاب کشائی وزیر نے خود کی۔اسی موقع پر حادثات سے پاک خدمات انجام دینے والے ڈرائیوروں کے لیے ترغیبی اسکیم کا آغاز بھی کیا گیا۔ علاوہ ازیں، ریاستی حکومت کے وشوکرما کامگار ایوارڈ یافتگان کو مبارکباد پیش کی گئی۔