ممبرا کی پہاڑی پر بنائے گئے ممبرا بائی پاس روڈ سے گزرنے کے دوران کیمیکل لے جانے والا ٹینکر بے قابو ہو کر قریب واقع نالے میں پلٹ گیا۔ خوش قسمتی سے اس حادثے میں کوئی جانی نقصان نہیں ہوا بلکہ ڈرائیور کو معمولی زخمی ہوا ہے

ممبرا کی پہاڑی پر بنائے گئے ممبرا بائی پاس روڈ سے گزرنے کے دوران کیمیکل لے جانے والا ٹینکر بے قابو ہو کر قریب واقع نالے میں پلٹ گیا۔ خوش قسمتی سے اس حادثے میں کوئی جانی نقصان نہیں ہوا بلکہ ڈرائیور کو معمولی زخمی ہوا ہے۔ تھانے میونسپل ڈیزاسٹر مینجمنٹ سے حاصل کردہ اطلاعات کے مطابق ایم آرتی فارما انڈسٹریز کا ٹینکر( نمبر: ایم ایچ ۰۴/ای وائی ۹۱۳۴) میں ۲۵؍ ہزار لیٹر کیمیکل ( سلفیورک ایسڈ) لےکر بھویئسر سے جالنہ جارہا تھا۔ سنیچر کی صبح  تقریباً ۵؍ بجے ممبرا بائی پاس روڈ سے تھانے سے شیل پھاٹا کی جانب  ون سائڈ ڈھابہ کے قریب ڈرائیور توازن کھو بیٹھا اور ٹینکر نالے  میں پلٹ گیا۔ حادثہ کی اطلاع ملتے ہی ممبرا فائر بریگیڈ، وارڈ آفس ، مقامی پولیس، ٹیکنو کمپنی کےکیمیکل اور آرتی فارما کیمیکل کے ماہرین  کی ٹیم جائے حادثہ پر  پہنچے اور ٹینکر میںپھنسے ہوئے ڈرائیور برجیش سرول (۴۵) کو باہر نکالا۔ اسے ہاتھ، کمر اور چہرے پر چوٹ آئی تھی۔ حادثہ کے سبب ٹینکر پلٹ جانے سے سلفیورک ایسڈ کاا خراج شروع ہو گیا تھا جس سے دھواں اٹھنے کے ساتھ بدبو بھی پھیل رہی تھی۔ ماہرین کے ذریعے تیزاب کو نالے میں بہایا گیا اور اس کے بعد کرین کی مدد سے دوپہر سوا ۳؍بجے ٹینکر کو نالے سے نکالا گیا۔ادھربھیونڈی میں آگرہ روڈ پر کرشنا کمپلکس کے سامنے گڑھوں میں پھنس کر کوئلے سے بھرا ٹرک پلٹ گیا جس سے تقریباً ڈھائی گھنٹے تک ٹریفک جام رہا۔ پولیس کے مطابق کلیان ناکہ سے ایک ٹرک تقریبا ۲۰؍ ٹن کوئلہ لیکر نارپولی علاقے میں واقع ایک سائزنگ میں جارہا تھا۔ دوپہر تقریبا۱۲؍ بجے کے قریب ٹرک کرشنا کمپلیکس کے قریب پہنچا، سڑک پر بڑے گڑھے کی وجہ سے ٹرک کا توازن بگڑنے کے سبب وہ  پلٹ گیا اور ٹرک میں بھرا کوئلہ سڑک اور کرشنا کمپلکس کے احاطے میں پھیل گیا۔نتیجتاً کئی کلومیٹر تک ٹریفک جام ہوگیا اوراسکول جانے والے بچوں کوشدیددشواریوںکا سامنا کرنا پڑا ۔