’ کاکروچ جنتا پارٹی‘ (سی جے پی ) نے وزیرتعلیم دھرمیندر پردھان کے استعفیٰ   کے مطالبے پر دباؤ بڑھاتے ہوئے ملک گیر احتجاج کی تیاری کرلی ہے۔ ۶؍ جون کو جنتر منتر پر سی جے پی نے استعفیٰ کیلئے  ایک ہفتے کا الٹی میٹم دیاتھا۔اس کی مدت ختم ہونے  کے قریب ہے جس کے پیش نظر ملک بھر میں مظاہروں  اور اس کے بعد ایک بار پھر جنتر منتر پر دھرنادینے کی تیاری کی گئی ہے۔ 

 

 

سوشل میڈیا پر بطور طنز واحتجاج قائم ہونے  والی پارٹی کی جانب سے جاری کئے گئے بیان کے مطابق دہلی میں جنتر منتر پر اگلے احتجاج سے قبل ملک گیر احتجاج کا آغاز جمعرات (۱۱؍ جون) کو پونے سے کیا جائےگا۔ پونے کے بعد لکھنؤ ،امرتسر، بنگلور، جےپور اور حیدرآباد میں  مظاہرے ہوںگے۔ پارٹی کی جانب سے جاری کئے گئے بیان میں کہاگیا ہے کہ ’’۶؍ جون کو جنتر منتر پر امڈنے والی تاریخی بھیڑ نے یہ واضح کردیا ہے کہ اس ملک کا نوجوان سوال پوچھنے میں حکومت سے خوف نہیں کھاتا۔ ملک بھر کے طلبہ امتحانی پرچوں میں  بار بار کی خامیوں ، ان کے لیک ہونے اور تکنیکی خامیوں   پر جوابدہی چاہتے ہیں۔اس کی وجہ سے لاکھوں  طلبہ کا مستقبل  متاثر  ہوا ہے۔ ‘‘ سی جے پی نے اعلان کیا ہے کہ پونے سے شروع ہونےوالا احتجاج دیگر شہروں میں اس وقت تک  پھیلتا رہے گا جب تک کہ وزیرتعلیم استعفیٰ نہیں دیدیتے۔