یہاں جوئی نگر شرونے ریلوے کا سب وے گاڑی والوں اورراہ گیروں کیلئے پریشانی کا باعث بنتا جا رہا ہے۔

: یہاں  جوئی نگر شرونے ریلوے کا سب وے  گاڑی والوں اورراہ گیروں کیلئے  پریشانی کا باعث بنتا جا رہا ہے۔ اس کی وجہ  ہے کہ کھلی گٹر جس کا پانی  بہہ کر سب وے میں آرہا ہے۔ گنیش پاٹل نامی  شخص نے کہا کہ   جوئی نگر،  جوئی پاڑہ گاؤں  اورنیرول کے  سیکٹر۲؍  میں رہنے والے افراد کیلئے شرونے گاؤں  اورنیرول ایل پی  شاہراہ جانے کیلئے  یہ سب وے آسان اور قریب ہونے کی وجہ سے اس کا بڑی تعداد میں استعمال ہوتا ہے۔    اس کے علاوہ شرونے گاؤں میں ہر اتوارکو ہفتہ واری بازار لگنے کی وجہ سے لوگ بڑی تعداد میں سب وے  سے یہاں پر خریداری کیلئے آتے ہیں۔ طلبہ بھی اسکول جانے کیلئے اس  سب وے کا استعمال کرتے ہیں لیکن گزشتہ ۶،  ۷؍ مہینے سے  یہاں موجود گٹر کھلی ہے اور اس کا پانی باہر آجاتا ہے جس کی وجہ سے لوگوں کو  گندے پانی سے ہوکرگزر نا پڑتا ہے۔طلبہ کے یونیفارم بھی گندہ پانی اڑنے سے خراب ہو جاتے ہیں۔  بہت سی گاڑیاں  پانی کی وجہ سے پھسل جاتی ہیں۔ اگر کوئی گاڑی تیز رفتاری سے گزرتی ہے تو گٹر کا پانی لوگوں کے کپڑوں پر اڑ تا ہے۔ گٹر کے پانی کی نکاسی کا نظام بھی نہیں ہے۔
   نمائندۂ انقلاب نے اس سلسلے میں  نوی ممبئی میونسپل کارپوریشن کے  اسسٹنٹ انجینئر  پنڈری ناتھ چوڑے سے استفسار کیا تو انہوں نے کہا کہ یہاں پر موجود گٹروں کی مرمت کا کام ہم نے ۶؍ مہینے پہلے کیا تھا۔ اس کے علاوہ  ۱۰؍ہارس  پاور انجن کے ۲؍پمپ بھی لگائے ہیں  تاکہ بارش کا پانی یہاں پر جمع نہ ہو۔  ہم جلد ہی سب وے کا معائنہ کرکے اس کی صاف صفائی اورگٹر کی مرمت  کے علاوہ دیگر تکنیکی خامیاں دور کریں گے تاکہ لوگوں کو پریشانی سے نجات مل سکے۔