دونوں پارٹیوں کے انضمام کی بات چیت حتمی مراحل میں داخل ہو چکی ہے۔

ممبئی (اسٹاف رپورٹر): کانگریس اور این سی پی (شرد پوار) ان دو پارٹیوں کے انضمام کی خبریں بہت دنوں سے چل رہی ہیں مگر اب ایسا لگتا ہے کہ انضمام کو حتمی شکل ملنے جارہی ہے اور ممکن ہے کہ جلد ہی اس کا اعلان ہو۔ خبروں کے مطابق کانگریس لیڈر وجے ویڈیٹیوار نے اس کی توثیق کی اور کہا ہے کہ ہائی کمان کے ساتھ بات چیت جاری ہے۔ این ڈی ٹی وی کی ایک رپورٹ کے مطابق وجے ویڈیٹیوار نے کہا کہ ’’جو لوگ کانگریس اور شرد پوار کی سیکولر اقدار پر یقین رکھتے ہیں اُن کا ہماری پارٹی میں ہمیشہ استقبال کیا جائیگا۔‘‘ واضح رہے کہ وجے ویڈیٹیوار مہاراشٹر کانگریس کے سینئر لیڈر اور ریاست کے سابق اپوزیشن لیڈر ہیں۔ این ڈی ٹی وی نے اس خبر کے ساتھ ذرائع کے حوالے سے بتایا کہ مذکورہ دو پارٹیوں کے انضام کے سلسلے میں جو بات چیت جاری ہے وہ حتمی مراحل میں داخل ہوچکی ہے۔ قارئین جانتے ہیں کہ یہ دو پارٹیاں ۲۰۱۴ء تک مہاراشٹر میں اقتدار میں تھیں۔ اس کے بعد، ۲۰۱۴ء کا الیکشن بی جے پی اور شیو سینا نے جیتا تھا۔ اس سے بھی قبل شرد پوار نے ۱۹۹۹ء میں کانگریس سے ناطہ توڑا تھا تب اُنہوں نے این سی پی بنائی تھی۔ اس سے قبل وہ کانگریس ہی میں تھے بلکہ ریاست میں کانگریس کے وزیر اعلیٰ بھی رہے۔ 

یہ بھی پڑھئے: منواسمرتی معاملہ پر پرکاش امبیڈکر کی مرکز پر سخت تنقید

مگر شرد پوار کی پارٹی کو جھٹکا اس وقت لگا جب پوار کے بھتیجے اجیت پوار متعدد ایم ایل ایز کے ساتھ الگ ہوگئے۔