اسرائیلی وزیر اعظم نیتن یاہو کی جانب سے امریکہ جانے کیلئے  فرانس سمیت متعدد یورپی ممالک کی فضائی حدود استعمال نہ کرنے کا انکشاف ہوا ہے۔

اسرائیلی وزیر اعظم نیتن یاہو کی جانب سے امریکہ جانے کیلئے  فرانس سمیت متعدد یورپی ممالک کی فضائی حدود استعمال نہ کرنے کا انکشاف ہوا ہے۔  غیر ملکی میڈیا کے مطابق امریکہ جانے کیلیے نیتن یاہو کے طیارے نے گرفتاری کے خوف سے متعدد یورپی ممالک کی فضائی حدود استعمال کرنے سے گریز کیا، غزہ میں جنگی جرائم کے الزام میں عالمی فوجداری عدالت (آئی سی سی) نے ان کے وارنٹ گرفتاری جاری کر رکھے ہیں۔ آئی ۲۴؍ نیوز چینل کے سفارتی نامہ نگار امیچائی سٹین کے مطابق نیتن یاہو کے طیارے نے فرانس کی فضائی حدود سے گریز کیا جس سے آئی سی سی کے گرفتاری وارنٹ اور تل ابیب و پیرس کے درمیان غزہ جنگ کے حوالے سے موجودہ کشیدگی کے باعث سفر طویل ہوا۔  نامہ نگار نے بتایا کہ اسرائیلی وزیر اعظم کا طیارہ یونان اور اٹلی کے علاوہ کسی یورپی ملک کے اوپر سے نہیں گزرا۔  نومبر۲۰۲۴ء میں ہیگ میں قائم عدالت نے نیتن یاہو اور سابق وزیر دفاع یووا گیلنٹ کے خلاف غزہ میں جنگی جرائم اور انسانیت کے خلاف جرائم کے الزامات میں گرفتاری وارنٹ جاری کیے تھے۔  نیتن یاہو تل ابیب سے اقوام متحدہ کی جنرل اسمبلی کے۸۰؍ویں اجلاس سے خطاب کرنے اور پیر کو وہائٹ ہاؤس میں امریکی صدر ڈونالڈ ٹرمپ سے ملاقات کیلئے  روانہ ہوئے۔  روانگی سے قبل تل ابیب کے بین گوریون ایئرپورٹ پر صحافیوں سے گفتگو کرتے ہوئے اسرائیلی وزیر اعظم کا کہنا تھا کہ وہ ان ممالک کے لیڈران کی مذمت کریں گے جنہوں نے فلسطینی ریاست کو تسلیم کیا۔  واضح رہے کہ اس ہفتے فرانس، برطانیہ، کینیڈا، آسٹریلیا اور بلجیم  سمیت کئی ممالک نے فلسطین ریاست کو تسلیم کیا۔ اقوام متحدہ کے۱۹۳؍ رکن ممالک میں سے۱۵۹؍ فلسطین کو بطور ریاست تسلیم کر چکے ہیں۔