کاندیولی اور بوریولی سیکشن پر چھٹی لائن کے کام کے لئے سنیچر اور اتوار کی شب سے ایک مہینے کا بلاک شروع کیا گیا ہے۔ اس سے کئی لوکل اور طویل مسافتی خدمات متاثر ہوں گی۔ ۱۸؍جنوری تک یہ بلاک جاری رہے گا۔ اس سے مسافروں کو زبردست پریشانی کا اندیشہ ہے۔اس دوران کاندیولی اور بوریولی اسٹیشنوں پر کئی کراس اوور ڈالے اور ہٹائے جائیں گے اور بڑے انجینئرنگ، سگنلنگ اور اوور ہیڈ آلات کا کام کیا جائے گا۔

شروع کئے گئےاس ایک ماہ کے بلاک کے تعلق سے ویسٹرن ریلوے کے چیف پی آر اوونیت ابھیشیک نے نمائندۂ انقلاب کوبتایا کہ’’ اس دوران پانچویں لائن پر ٹرینوں کی آمدورفت بند رہےگی اور دیگر لائنوں پر ٹرینوں کی رفتار محدود کی جائے گی۔ بلاک کے دوران پانچویں لائن پر چلنے والی تمام میل،ایکسپریس اور لوکل ٹرینیں اندھیری، گوریگاؤں اور بوریولی کے درمیان تیز رفتار لائنوں پر چلائی جائیں گی۔‘‘چیف پی آر اونے یہ بھی بتایاکہ’’شروع کردہ بلاک ۲۶؍ دسمبرتک روزانہ ۱۱؍بجے سے۴؍بجکر ۳۰؍  منٹ تک کیا جائے گا۔ ان ۶؍دنوں میں مجموعی طور پر۱۸۸؍ سروسیز متاثر ہوں گی۔‘‘

ان کا یہ بھی کہنا تھا کہ ’’ نئے سال کی تقریبات کے پیش نظر ۳۱؍ دسمبر ۲۰۲۵ءکو کم سے کم ٹرینیں منسوخ کرنے کی کوشش کی جائے گی۔ تھرٹی فرسٹ کے تعلق سے منصوبہ بندی کی تفصیلات چند دن میں بتائی جائیں گی۔‘‘