ایم آئی ایم سربراہ نے کہا کہ ان کی پارٹی کا مقصد بہار میں این ڈی اے کوروکنا ہے۔

 مجلس اتحادالمسلمین (ایم آئی ایم ) کے سربراہ اور رکن پارلیمنٹ اسدالدین اویسی نے بہار میں انڈیا اتحاد میں شامل ہونے کا اشارہ دیا ہے۔خبر رساں ایجنسی اے این آئی سے گفتگو کرتے ہوئے ا نہوں نے کہا کہ ان کی پارٹی بہار میں مہا گٹھ بندھن کے لیڈروں کےساتھ رابطے میں ہے اور ان کامقصد آئندہ انتخابات میں بہار میں این ڈی اے کو اقتدار میں آنے سے روکنا ہے۔
  واضح رہےکہ اویسی کی پارٹی آل انڈیا اتحاد المسلمین کی بہار کے ضلع سیمانچل علاقے میں مضبوط پوزیشن ہےمگر پارٹی کو ۲۰۲۲ء میں اس وقت بڑا جھٹکا لگاتھا جب پارٹی کے ۵؍ میں سے ۴؍ اراکین اسمبلی تیجسوی یادو کی آر جے ڈی میں شامل ہو گئے تھے۔ اویسی نے کہا کہ ان کی پارٹی نہ صرف سیمانچل میں بلکہ اس سے باہر بھی امیدوار کھڑے کرے گی۔ اے آئی ایم آئی ایم کے سربراہ اسد الدین اویسی نے اتوار کو کہا کہ ان کی پارٹی نے بہار میں اپوزیشن مہاگٹھ بندھن کے رہنماؤں سے رابطہ کیا ہے کیونکہ پارٹی کا مقصد این ڈی اے کو آئندہ انتخابات میں اقتدار میں واپس آنے سے روکنا ہے۔اویسی نے کہا کہ اے آئی ایم آئی ایم کے بہار ریاستی صدر اختر الایمان عظیم اتحاد کے لیڈروں سے رابطے میں ہیں جن میں کانگریس، آر جے ڈی اور دیگر پارٹیوں کے لیڈر شامل ہیں۔ انہوں نے بتایاکہ پارٹی نے بہار میں بی جے پی اور اس کے اتحادیوں کے خلاف الیکشن لڑنے میں اپنی دلچسپی ظاہر کی ہے۔اویسی نے کہا `ہمارے ریاستی صدر اختر الایمان نے عظیم اتحاد کے کچھ رہنماؤں سے بات کی ہے اور انہوں نے صاف کہہ دیا ہے کہ ہم نہیں چاہتے کہ بہار میں بی جے پی یا این ڈی اے دوبارہ اقتدار میں آئے۔ اب فیصلہ ان سیاسی جماعتوں پر منحصر ہے جو بہار میں این ڈی اے کو اقتدار میں واپس آنے سے روکنا چاہتی ہیں۔ اس سےقبل اویسی نے الیکشن کمیشن کو خط لکھ کرووٹر لسٹ پر نظر ثانی کی مخالفت کی تھی اور اس پر سوال اٹھائے تھے۔