آسٹریا کے دارالحکومت ویانا میں ہونے والی انٹرنیشنل پریس انسٹی ٹیوٹ(آئی پی آئی) کی سالانہ کانگریس میں دنیا بھر سے تعلق رکھنے والے ۷؍ بہادر صحافیوں کو پریس فریڈم ہیروز ایوارڈ۲۰۲۵ء سے نوازا گیا۔

ان میں شہید فلسطینی صحافیہ مریم ابو دقہ بھی شامل ہیں جنہیں اسرائیلی فوج نے۲۵؍اگست کو فرائض کی انجام دہی کے دوران شہید کیا تھا۔ رپورٹ کے مطابق، اس سال ایوارڈ کے لئے  منتخب صحافیوں میں فلسطین کی مریم ابو دقہ، یوکرین کی وکٹوریا روشچینا، ہانگ کانگ کے جمی لائی، امریکہ کے مارٹن بیرن، پیرو کے گستاوو گوریٹی، جارجیا کی مزیہ اماگلوبیلی اور ایتھوپیا کے تسفیلم والڈیس شامل ہیں۔

اس تقریب میں دو بہادر و جرأتمند صحافیوں کو بعد از مرگ اعزاز دیا گیا، جن میں مریم ابو دقہ اور یوکرین کی وکٹوریا روشچینا شامل ہیں۔ دونوں نے دورانِ جنگ،  آزادی صحافت کےلئے  اپنی جانوں کا نذرانہ پیش کیا۔اس باوقار تقریب کے  کے شرکاء نے عالمی سطح پر آزادی صحافت کے تحفظ کے لئے قربانیاں دینے والے صحافیوں کو خراج تحسین پیش کیا اور اس عزم کا اظہار کیا کہ سچائی کے لیے قربان ہونے والوں کی جدوجہد کو ہمیشہ یاد رکھا جائے گا۔غیر ملکی خبررساں ایجنسی کی رپورٹ کے مطابق  ہنگری کے آزاد میڈیا ادارے کو اس موقع پر فری میڈیا پائینئر ایوارڈ بھی دیا گیا۔