وزیر اعلیٰ سدا رمیا کی موجودگی میں بنگلور تا بیلگاوی ٹرین کو موقع پر ہری جھنڈی دکھائی جبکہ کٹرا تا امرتسراورناگپور تا پونے ٹرین کا ریموٹ کنٹرول سے افتتاح کیا۔

وزیر اعظم مودی  اتوار کو کرناٹک کے دورہ پر تھے جہاں بنگلور سے انہوں نے مزید تین  وندے بھارت ایکسپریس ٹرینوں کو ہری جھنڈی دکھائی اورہندوستان کی معاشی ترقی کا بھی ذکر کیا ۔انہوں نے کافی دنوں سے منتظر بنگلور-بیلگاوی کو خود ہری جھنڈی دکھائی جبکہ شری ماتا ویشنو دیوی کٹرا-امرتسر اور ناگپور تا پونے    وندے بھارت خدمات کی شروعات ڈیجیٹل  واسطے سے کی۔ اس موقع پر وزیر اعظم کے ساتھ کرناٹک کے گورنر تھاور چند گہلوت، وزیر اعلیٰ سدارمیا، مرکزی وزیر ریل اشوینی ویشنو سمیت کئی دیگر افراد موجود تھے۔اس سے پہلے وزیر اعظم مودی جب اپنے قافلہ کے ساتھ کے سی آر ریلوے اسٹیشن کی طرف بڑھے تو سڑک کی دونوں جانب کھڑے لوگوں نے ’مودی-مودی‘ کے نعروں کے ساتھ ان کا استقبال کیا۔ مودی نے بھی اپنی کار کے اندر سے ان کا ہاتھ ہلا کر شکریہ ادا کیا ۔ اس کے بعد وزیر اعظم بنگلور اسٹیشن پہنچے اور ٹرین کو ہری جھنڈی دکھائی۔ بعد میں وزیر اعظم نے بنگلور میٹرو کی یلو لائن کا بھی افتتاح کیا۔ اس میں انہوں نے وزیر اعلیٰ، نائب وزیر اعلیٰ ڈی کے شیو کمار سمیت دیگر لیڈروں کے ساتھ سفر بھی کیا اور طلبہ سے بھی بات چیت کی  ۔ وزیر اعظم نریندر مودی نے  اس موقع پر امریکی صدر ڈونالڈ ٹرمپ کا نام لیے بغیر ان کے ذریعے ہندوستان کو ’ مردہ معیشت ‘ قراردینے کا جواب دیا۔ مودی نے بنگلور میں کہا کہ ہندوستان دنیا میں سب سے تیزی سے ترقی کرنے والی معیشت ہے۔ ہم ۱۰؍نمبر سے ۵؍ پر آگئے ہیں۔ جلد ہی ٹاپ۳؍ میں ہوں گے۔ یہ طاقت اصلاح، کارکردگی اور تبدیلی سے آئی ہے۔ ملکی کامیابیوں کا پرچم آسمان پر بلند ہو رہا ہے۔ واضح رہےکہ امریکی صدر نے ۳۱؍ جولائی کو ہندوستان پر ۲۵؍ فیصد ٹیرف لگا کر ہندوستان اور روس کو مردہ معیشت قرار دیا تھا۔ ٹرمپ نے کہا تھاکہ  ہندوستان  اور روس کو اپنی معیشتوں کے ساتھ ڈوبنے دیں، مجھے کیا فرق پڑتا ہے۔