پنویل کے قریب شرودھن ٹول ناکہ پر احتجاج، ایم این ایس کےکئی کارکنوں کو پولیس نے تحویل میں لیا۔

ٹول ٹیکس معاف کرنے کے مطالبہ  پر مہاراشٹر نونرمان سینا (ایم این ایس) کے احتجاج کے مد نظر پیر کوملنڈ ٹول ناکہ پرپولیس کا سخت بندوبست تھا۔ گزشتہ دنوں ایم این ایس کے کارکنوں نے یہاں احتجاج کرتے ہوئے ٹول ٹیکس معاف کرنے کا مطالبہ کیا تھا۔ 
اسی طرح پنویل کے قریب شرودھن  ٹول ناکوں پر مہاراشٹر نو نرمان سینا(ایم این ایس) عہدیداروں اور کارکنوں نے پیر کو ٹول ٹیکس معاف کرنے کا مطالبہ کرتے ہوئے زبردست احتجاج کیا۔ پنویل ستیش نامی ایم این ایس ورکرنے بتایا کہ نائب وزیر اعلیٰ دیویندر فرنویس نے اعلان کیا تھا کہ مہاراشٹر میں چار پہیہ گاڑیوں کا ٹول معاف ہے، اس کے باوجود یہاں پر گاڑیوں سے ٹول وصول کیا جا رہا تھا  اس لئے ہم نے یہ احتجاج کیا۔ اس کے بعد چارپہیہ گاڑیوں  سے ٹول نہیں لیا جا رہاہے۔
پولیس نے احتجاج کرنے والے ایم این ایس  کے کئی ورکروں کو تحویل میں لے لیا اور پولیس اسٹیشن لے جانے کے بعد چھوڑ دیا۔ اس موقع پر ایم این ایس عہدیداران نے حکومت کو متنبہ کیا کہ اگر کسی بھی ٹول ناکہ پر ٹول وصول کیا گیا تو ایم این ایس اپنے اسٹائل میں   احتجاج کرے گی۔