نئی دہلی میں وزیر اعظم وشوکرما جینتی کے موقع پر اسکیم کی شروعات کریں گے۔پی ایم وشوکرما اسکیم کو مرکزی حکومت ۱۳۰۰۰؍ کروڑ روپے کے اخراجات کے ساتھ مکمل طور پر فنڈ فراہم کرے گی۔

وشوکرما جینتی کے موقع پر وزیر اعظم نریندر مودی ۱۷؍ ستمبر۲۰۲۳ء کو صبح تقریباً ۱۱؍بجے انڈیا انٹرنیشنل کنونشن اینڈ ایکسپو سینٹر، دوارکا، نئی دہلی میں ’’پی ایم وشوکرما‘‘کے نام سے ایک نئی اسکیم کا آغاز کریں گے۔
روایتی دستکاری سے وابستہ افراد کو مدد فراہم کرنے کے معاملے میں وزیر اعظم کی مستقل توجہ رہی ہے۔ اس توجہ کے پس پشت نہ صرف کاریگروں اور دستکاروں کی مالی مدد کرنے کی خواہش کارفرما ہے، بلکہ یہ قدیم روایت، ثقافت اور متنوع وراثت کو زندہ رکھنے اور مقامی مصنوعات، آرٹ اور دستکاری کے ذریعے پھلنے پھولنے کی خواہش پر مبنی ہے۔
 پی ایم وشوکرما اسکیم کو مرکزی حکومت ۱۳۰۰۰؍ کروڑ روپے کے اخراجات کے ساتھ مکمل طور پر فنڈ فراہم کرے گی۔ اس اسکیم کے تحت وشوکرماؤں کو بایومیٹرک پر مبنی پی ایم وشوکرما پورٹل کا استعمال کرتے ہوئے کامن سروس سینٹرس کے ذریعے مفت رجسٹرڈ کیا جائے گا۔ انہیں پی ایم وشوکرما سرٹیفکیٹ اور شناختی کارڈ، بنیادی اور اعلیٰ تربیت پر مشتمل مہارت کی اپ گریڈیشن ۱۵۰۰۰؍ روپےکی ٹول کٹ کی ترغیب،ایک لاکھ روپے کی (پہلی قسط) اور۲؍لاکھ روپے (دوسری قسط) تک بغیر ضمانت کے کریڈٹ سپورٹ کے ذریعے ۵؍فیصد کی رعایتی شرح سود، ڈجیٹل لین دین اور مارکیٹنگ سپورٹ کیلئے ترغیب فراہم کی جائے گی۔
 اس اسکیم کا مقصد ایسے استاد ۔ شاگرد کی روایت یا خاندان پر مبنی روایتی ہنر کی مشق کو مضبوط کرنااور پروان چڑھانا ہے جو وشوکرما اپنے ہاتھوں اور اوزاروں سے کام کر رہے ہیں ۔ پی ایم وشوکرما کی اولین توجہ کاریگروں اور دستکاروں کی مصنوعات اور خدمات تک رسائی کے ساتھ ساتھ معیار کو بہتر بنانا ہے اور اس بات کو یقینی بنانا ہے کہ وہ گھریلو اور عالمی و معیاری چین کے ساتھ مربوط ہوں ۔
یہ اسکیم ہندوستان بھر میں دیہی اور شہری علاقوں کے کاریگروں اور دستکاروں کو مدد فراہم کرے گی۔ پی ایم وشوکرما کے تحت ۱۸؍ روایتی دستکاریوں کا احاطہ کیا جائے گا۔ ان میں (۱) بڑھئی (۲) کشتی بنانے والا (۳) اسلحہ ساز (۴) لوہار (۵) ہتھوڑا اور ٹول کٹ بنانے والا (۶) تالا بنانے والا (۷)سنار (۸) کمہار ، (۹) مجسمہ ساز، پتھر توڑنے والا ،(۱۰) موچی ، (جوتا بنانے والا / جوتے کا کاریگر)(۱۱) میسن (راج مستری) (۱۲) ٹوکری/چٹائی/جھاڑو بنانے والا/رسی بننے و الا (۱۳) گڑیا اور کھلونا بنانے والا (روایتی)، (۱۴) حجام (۱۵) مالا بنانے والا(۱۶) دھوبی (۱۷) درزی اور(۱۸) ماہی گیری کے جال بنانے والا شامل ہے ۔