ایک ہفتے میں سڑک کی تعمیر سے متعلق اقدام نہ کرنے پر کانگریس کا ’راستہ روکو‘ آندولن کا انتباہ ،مہاراشٹر کانگریس کی ماحولیات ونگ کے صدر کی افسران سے ملاقات ، پی ڈبلیو ڈی کے انچار ج کو میمورنڈم دیا

بھیونڈی -کامن روڈ کی بدترین حالت نے عوام کی زندگی اجیرن کر دی ہے۔ گہرے گڑھوں، ٹوٹی ہوئی سڑک اور ناقص نکاسی کے نظام کی وجہ سے یہ سڑک اب حادثات کا گڑھ بن چکی ہے۔ دو اضلاع کو جوڑنے والی اس اہم شاہراہ پر روزانہ سیکڑوں گاڑیاں گزرتی ہیں مگر برسوں سے اس کی مرمت کی جانب کوئی سنجیدہ توجہ نہیں دی گئی۔ اب جبکہ برسات کا موسم قریب ہے، سڑک کی حالت مزید ابتر ہو چکی ہے جس سے شہریوں کی جانوں کو شدید خطرات لاحق ہیں۔
 شہریوں کی دشواریوں اور انتظامیہ کی مجرمانہ خاموشی کے خلاف آواز بلند کرتے ہوئے مہاراشٹر پردیش کانگریس کمیٹی (ماحولیات ونگ) کے صدر سمیر سُبھاش ورتک نے بھادوڈ میں واقع پی ڈبلیو ڈی کی مقامی شاخ میں ایک وفد کے ساتھ پہنچ کر افسران سے ملاقات کی۔ وفد نے پی ڈبلیو ڈی کے انچارج سے ملاقات کرکے انہیں صورتحال سے آگاہ کرتے ہوئے انتباہ دیا کہ اگر ایک ہفتے کے اندر سڑک کی تعمیر سے متعلق کوئی مثبت اقدام نہیں کیا گیا تو کانگریس۲۶؍ مئی کو راستہ روکو آندولن کرے گی۔ وفد نے انہیں میمورنڈم بھی پیش کیا ہے۔  
 اس ضمن میں وفد میں شامل کانگریس کے سینئر رکن پرویز خان (پی کے) نے ذرائع ابلاغ کے نمائندوں کو بتایا کہ سمیر ورتک نے پی ڈبلیو ڈی سے کہا کہ  یہ احتجاج صرف سڑک کی مرمت کے لئے نہیں بلکہ عوام کی زندگیوں کے تحفظ کے لئے ہے۔نیز حکومت کو عوامی دباؤ کا سامنا کرنے سے قبل اپنی ذمہ داری نبھانی چاہئے۔ انہوں نے سڑک کی موجودہ صورتحال پر گہری تشویش کا اظہار کرتے ہوئے کہا کہ اگر حکومت نے فوری کارروائی نہیں کی تو عوامی احتجاج شدت اختیار کرے گا، اور اس کے نتائج کی مکمل ذمہ داری انتظامیہ پر عائد ہوگی۔
 وفد میں پرویز خان (پی کے)، عمار پٹیل اشرف شیخ نوشاد شیخ  اور کانگریس کے دیگر لیڈران شامل تھے ۔