تلنگانہ کی حیدرآباد پولیس نے ’سندھیا ۷۰؍ایم ایم تھیٹر‘ میں ہونے والی بھگدڑ کی تحقیقات مکمل کر لی ہے۔ اس معاملہ میں پولیس نے۲۴؍ دسمبر کو عدالت میں فلم اداکار اَللو ارجن، تھیٹر مالکان اور۸؍ باؤنسر سمیت ۲۳؍لوگوں کے خلاف عدالت میں چارج شیٹ داخل کی ہے۔

تلنگانہ کی حیدرآباد پولیس نے ’سندھیا ۷۰؍ایم ایم تھیٹر‘ میں ہونے والی بھگدڑ کی تحقیقات مکمل کر لی ہے۔ اس معاملہ میں پولیس نے۲۴؍ دسمبر کو عدالت میں فلم اداکار اَللو ارجن، تھیٹر مالکان اور۸؍ باؤنسر سمیت ۲۳؍لوگوں کے خلاف عدالت میں چارج شیٹ داخل کی ہے۔ پولیس نے اپنی چارج شیٹ میں ان تمام کو قصوروار قرار دیا ہے۔ اب اس معاملہ میں عدالت سماعت کے بعد اپنا فیصلہ سنائے گی۔ حیدرآباد پولیس کمشنر وی سی سجنار نے سنیچر کو کہا کہ ’’سندھیا۷۰؍ ایم ایم تھیٹر میں پشپا۲؍ کے پریمیئر کے دوران بھگدڑ معاملہ میں ایک خاتون کی موت ہو گئی تھی۔ اس معاملہ میں جانچ پوری کر لی گئی ہے۔ کیس کی چارج شیٹ عدالت میں داخل کر دی گئی ہے۔ ‘‘ ساتھ ہی انہوں نے کہا کہ ’’اس معاملے میں ۲۳؍لوگوں کے خلاف چارج شیٹ داخل کی گئی ہے۔ ان میں سے ۱۴؍کو گرفتار کیا گیا، جبکہ ۹؍ملزمان کو پیشگی ضمانت مل گئی تھی، انہیں ضابطے کے مطابق نوٹس جاری کر دیئےگئے ہیں۔ ‘‘
پولیس کمشنر وی سی سجنار نے کہا کہ تحقیقات کے دوران ’سندھیا۷۰؍ایم ایم تھیٹر‘ میں منصوبہ بندی، ہجوم کے انتظام، سیکورٹی کی تعیناتی اور انٹر-ایجنسی جیسی کئی خامیاں پائی گئی ہیں۔ ان تمام کو چارج شیٹ میں نوٹ کیا گیا ہے۔ ان کا یہ بھی کہنا ہے کہ اس واقعہ میں تھیٹر انتظامیہ، ایونٹ کے منتظمین، پرائیویٹ سیکوریٹی اسٹاف اور پروگرام کے دوران گراؤنڈ انتظامات کیلئے ذمہ دار دیگر لوگ شامل تھے۔ ساتھ ہی انہوں نے کہا کہ۲۴؍ دسمبر کو۱۰۰؍ صفحات کی چارج شیٹ نامپلی کورٹ میں داخل کر دی گئی ہے۔ ساتھ ہی اس معاملہ میں ضمانت پر چل رہے لوگوں کو نوٹس بھی جاری کیا گیا ہے۔ پولیس کمشنر کا کہنا ہے کہ فلم اداکار اللو ارجن، ان کے منیجر، پرسنل سیکوریٹی گارڈ اور فین اسوسی ایشن کے نمائندوں کے ساتھ تھیٹر پارٹنرز، اسٹاف، ایونٹ آرگنائزر اور باؤنسروں کو بھی چارج شیٹ میں نامزد کیا گیا ہے۔ تفتیشی افسر نے چارج شیٹ میں تمام ملزمان کے بارے میں الگ الگ تفصیلات دی ہیں۔ ساتھ ہی واقعہ کے وقت وہ لوگ کیا کر رہے تھے اور واقعہ کے بعد کہاں گئے، ان تمام باتوں کو تفصیل سے بتایا گیا ہے۔ 
قابل ذکر ہے کہ گزشتہ سال اللو ارجن کی فلم ’پشپا۲‘ ریلیز ہوئی تھی۔ ۴؍ دسمبر کو حیدرآباد کے چکڑ پالی میں واقع ’سندھیا تھیٹر‘ میں فلم کی اسکریننگ رکھی گئی تھی۔ یہاں اداکار اَللو ارجن کو بھی آنا تھا۔ اپنے پسندیدہ اداکار کی ایک جھلک پانے کی خاطر شائقین کا ایک بڑا ہجوم جمع ہو گیا۔ بھیڑ اس قدر بے قابو ہو گئی کہ وہاں بھگدڑ مچ گئی۔ اس حادثے میں ایک۳۵؍ سالہ خاتون کی جان چلی گئی اور ان کا۸؍ سالہ بیٹا زخمی ہو گیا تھا۔ اس واقعے کے بعد اللو ارجن کو ایک دن کیلئے جیل بھی جانا پڑا تھا۔