کواڈ ممالک نے اہم معدنیات اقدام فریم ورک کا فیصلہ معدنی سپلائی چین کے شعبے میں، خاص طور پر چین کی من مانی کو مدنظر رکھتے ہوئے کیا ہے۔

 دنیا بھر میں معدنیات اور توانائی کی سپلائی چین میں اجارہ داری توڑنے کے مقصد سے چار ملکی تنظیم کواڈ کے رکن ممالک ہندوستان، آسٹریلیا، جاپان اور امریکہ نے ۲۰؍ ارب ڈالر کی سرمایہ کاری کے ساتھ ’’کواڈ اہم معدنیات اقدام فریم ورک‘‘ کا اعلان کیا ہے۔  کواڈ ممالک نے اہم معدنیات اقدام فریم ورک کا فیصلہ معدنی سپلائی چین کے شعبے میں، خاص طور پر چین کی من مانی کو مدنظر رکھتے ہوئے کیا ہے۔ 
کواڈ ممالک کے وزرائے خارجہ کی منگل کے روز کو نئی دہلی میں  ہونے والی میٹنگ میں اس اقدام کا اعلان کیا گیا۔  اجلاس کے بعد جاری بیان میں کہا گیا کہ رکن ممالک اہم معدنیات کی سپلائی چین کو مضبوط بنانے کا ارادہ رکھتے ہیں۔ یہ سپلائی چین جدید ٹیکنالوجی، اقتصادی ترقی اور صنعتی بنیادوں کی مضبوطی کے لیے ناگزیر ہیں۔ اس فریم ورک کے ذریعے یہ ممالک اقتصادی پالیسی کے ذرائع اور مربوط سرمایہ کاری کا استعمال کرتے ہوئے متنوع اور منصفانہ  اہم معدنیات  کی منڈیوں کی ترقی کو تیز کرنے کے لیے مل کر کام کرنے کا ارادہ رکھتے ہیں۔ ساتھ ہی یہ ممالک خطے کی اقتصادی ترقی اور سلامتی کے لیے نہایت اہم ’’کریٹیکل منرلز‘‘ کی فراہمی کو مضبوط بنائیں گے۔ 
اس فریم ورک میں ’اہم معدنیات‘ کی سپلائی چین کے حوالے سے کواڈ شراکت دار ممالک کے درمیان تعاون کے اہم شعبوں کا تعین کیا گیا ہے اور ہر شراکت دار ملک کی داخلی پالیسیوں اور ترجیحات کا مناسب خیال رکھا گیا ہے۔  فریم ورک کے مطابق کواڈ شراکت دار ممالک اہم معدنیات کی سپلائی چین کو مضبوط بنانے کے لیے کان کنی، پراسیسنگ اور ری سائیکلنگ سمیت مختلف شعبوں میں نئے اور موجودہ اقدامات کے ذریعے سرکاری اور نجی شعبے سے تقریباً ۲۰؍ ارب ڈالر تک کی سرمایہ کاری جمع کرنے کا ارادہ رکھتے ہیں۔ 

یہ بھی پڑھئے:علی فضل نے کہا :’’مرزاپور: دی فلم‘‘ گڈو پنڈت کو نئی سطح پر لے جاتی ہے

اس مقصد کے لیے ان منصوبوں کی نشاندہی کی جائے گی جن کا کواڈ سے براہِ راست تعلق ہو، جیسے وہ منصوبے جو کواڈ شراکت دار ممالک میں واقع ہوں، کواڈ ممالک میں قائم مرکزی دفاتر والی کمپنیوں کے ذریعے چلائے جا رہے ہوں، یا کواڈ منڈیوں کو سپلائی فراہم کرتے ہوں اور جو ’’کریٹیکل منرل‘‘ سپلائی چین میں موجود خامیوں کو دور کرتے ہوں۔  اس میں اسٹریٹجک ’’کریٹیکل منرل‘‘ منصوبوں کی حمایت بھی شامل ہے۔

یہ بھی پڑھئے:آسٹریلیا کو پاکستان کے گرم موسم سے کوئی مسئلہ نہیں ہوگا: میتھیو شارٹ

فریم ورک کے مطابق کواڈ شراکت دار ای ویسٹ (الیکٹرانک فضلہ) اور دیگر اسکریپ مواد سے اہم معدنیات کی بازیابی اور استعمال کو بہتر بنانے کے لیے مل کر کام کرنے کا ارادہ رکھتے ہیں، تاکہ سپلائی چین کو وسعت دی جا سکے اور کواڈ شراکت داروں اور ہم خیال ممالک کے اندر اہم معدنیات کی ری سائیکلنگ کو فروغ دیا جا سکے۔