آر ایس ایس کو ’’بنچ آف جوکرس‘‘ قرار دیا، کہا: استعفیٰ دینے تک مودی اور امیت شاہ چین سے سونہیں سکیں گے۔

ملک کی ترقی کیلئے  اتحاد و ہم آہنگی اورآزادی ٔ اظہار رائے پر مبنی کانگریس کے نظریہ کو  پیش کرتے ہوئے کانگریس کے سینئر لیڈر  راہل گاندھی  نے پارٹی کی موجودہ جدو جہد کے  حوالے سے پرعزم لہجے میں کہا کہ ’’مودی اور امیت شاہ اس وقت تک چین کی نیندسونہیں سکیں گے، جب تک کہ استعفیٰ نہ دیدیں۔‘‘ دہلی میں اپنی پارٹی کے سول سوسائٹی پلیٹ فارم ’’رچناتمک کانگریس‘‘ کی قومی کانفرنس میںاپنی تاریخی تقریر میں راہل گاندھی نےآر ایس ایس   کے نظریہ ساز گولوالکر کی کتاب’’بنچ آف تھاٹس‘‘ کا نام لئے بغیر برسراقتدار طبقہ کو ’’بنچ آف جوکرس‘‘ قرار دیا اور کہا کہ ’’ان سے ڈرنے کی کوئی وجہ نہیں۔‘‘ 

یہ بھی پڑھئے: آج یوم آزادی پر شہر میں مختلف تقریبات

راہل گاندھی کی تقریر میں’جین زی ‘ کے بے باک اور طنزیہ انداز کی جھلک  واضح طو رپر محسوس ہورہی تھی۔   طنز،  حاضر جوابی، مزاح اور برجستگی کے ساتھ، راہل گاندھی کی شخصیت کا ایک ایسا پہلو دیکھنے کو ملا جو کم دیکھنے کو ملتا ہے۔ ماولنکر ہال میں کارکنوں، فنکاروں اور مرکز میں سیاسی تبدیلی کے خواہش  افراد سے خطاب  میں راہل گاندھی  نے کہا کہ نیٹ پرچہ لیک  کے خلاف احتجاج اور دیگر تحریکیں جائز اظہارِ رائے ہیں، جو نریندر مودی حکومت کے ’’عوامی نظم و ضبط ‘‘کے تصور سے متصادم ہیں۔ راہل نے کہاکہ ’’ان (حکومت) کا کام اور ان کا سیاسی فلسفہ ہندوستان پر ایک ایسا نظم مسلط کرنا ہے جو ان کے اور کچھ دوسرے لوگوں کے مفاد میں ہو۔ ہمارا کام ہندوستان کو اپنے اظہار کا موقع دینا اور اس نظم کو توڑنا ہے۔‘‘

رچناتمک کانگریس کے چیئرمین سندیپ دکشت کو بطور کردار استعمال کرتے ہوئے راہل نے اپنی تقریر کے دوران اچانک ڈرامائی  کے انداز میں اداکاری بھی کی اور یہ سمجھانے کی کوشش کی کہ لوگ احکامات کیسے دیتے، لیتے اور ماننے سے انکار کرتے ہیں۔ ایک موقع پر راہل نے دکشت کو گلے لگا کر مودی کی خارجہ پالیسی کا  بھی مذاق اڑایا۔راہل گاندھی  نےمودی حکومت کے خلاف جدوجہد کے تعلق سے کہاکہ ’’ہمارا کام بہت آسان ہے...ہم انہیں پاگل کر دیںگے۔میں آپ کو بتا رہا ہوں، نریندر مودی رات کو نہیں سوتے۔ اس کی ایک واضح وجہ ہے اور بہت سی خفیہ  وجوہات بھی ہیں۔ آپ نے امیت شاہ کو دیکھا؟ پہلے انہیں کیا کہا جاتا تھا؟ چانکیہ۔‘‘ اپوزیشن لیڈر نے کہاکہ’’ وہ۲۰؍ دن تک پارلیمنٹ ہاؤس میں داخل بھی نہیں ہو سکے۔ کیوں؟ کیونکہ پہلی بار انہیں ہندوستان کے اظہار رائے کا سامنا  ہو رہا ہے۔‘‘