کانگریسی لیڈر راہل گاندھی نے راجستھان میں ایک پریس کانفرنس کے دوران خواتین ریزرویشن بل کو نشانہ بناتے ہوئے کہا کہ حکومت کو جلد از جلد مردم شماری اور حد بندی کے بغیر خواتین ریزرویشن بل نافذ کرنا چاہئے۔ وزیر اعظم مودی ۲۴؍ گھنٹہ او بی سی طبقے کی بات کرتے ہیں تو پھر وہ مردم شماری کرنے سے کیوں گھبر ا رہے ہیں۔ انہیں او بی سی طبقے کو دھوکا نہیں دینا چاہئے اور نہ ہی اس کی توہین کرنی چاہئے۔

کانگریسی لیڈر راہل گاندھی نے مردم شماری کی وکالت کی اور پوچھا کہ کیوں وزیراعظم نریندر مودی مردم شماری کرنے سے ڈر رہے ہیں? انہوں نے مطالبہ کیا کہ جلد از جلد لوک سبھا اور ریاستی اسمبلیوں میں ریزرویشن نافذ کیا جائے۔ خیال رہے کہ راجیہ سبھا میں خواتین ریزرویشن کو منظوری دے دی گئی تھی جس کے ذریعے خواتین کو ایک تہائی ریزرویشن دیا جانا ہے۔ اس بل کو ناری شکتی وندن ابھی نیام کا نام دیا گیا ہے جسے متعدد ریاستی اسمبلیوں سے منظوری ملنا باقی ہے۔ حکومت کا کہنا ہے کہ اس بل کو مردم شماری اور حد بندی کی مشق کے بعد نافذ کیا جائےگا۔ اس ضمن میں راہل گاندھی نے راجستھان میں ایک پریس کانفرنس سے خطاب کرتے ہوئے کہا کہ بی جے پی چاہتی ہے کہ خواتین کا ریزرویشن اگلے ۱۰؍ سالوں میں نافذ کیا جائے مگر ہم چاہتے ہیں کہ اسے آج ہی نافذ کیا جائے اور اس میں او بی سی کوٹے کو بھی شامل کیا جائے۔

خیال رہے کہ اس بل کو راجیہ سبھا کے خاص اجلاس میں پاس کیا گیا تھا جس کا آغاز ۱۸؍ ستمبر کو ہوا تھا۔ راہل گاندھی نے مزید کہا کہ خواتین ریزرویشن بل آج ہی لوک سبھا اور ریاستی اسمبلیوں میں نافذ کیا جا سکتا ہے لیکن مرکزی حکومت مردم شماری اور درجہ بندی کا بہانہ بنا کر اس میں ۱۰؍ سال تاخیر کرنا چاہتی ہے۔ کانگریس کا مطالبہ ہے کہ اس بل کو آج ہی نافذ کیا جائے۔ مردم شماری کا مطالبہ کرتےہوئے انہوں نے کہا کہ اگر ہم او بی سی کی شمولیت کی بات کریں تو یہ مردم شماری کے بغیر نہیں ہو سکتا۔ پھر نریند ر مودی ۲۴؍ گھنٹہ اوبی سی کی بات کرتے ہیں۔ وہ او بی سی طبقے کی عزت کرنے کی بھی بات کرتے ہیں تو مردم شماری کرنے سے کیوں گھبرا رہے ہیں؟
انہوں نے مزید کہا کہ وزیراعظم اپنی اگلی تقریر میں ملک کو بتایئے گا کہ کانگریس نے اپنے اقتدار میں مردم شماری کی تھی۔ آپ کے پاس اس کے اعداد و شمار ہیں۔ اسے ملک کے لوگوں کو دکھائیے۔ آپ کو ذات کی بنیاد پر اگلی مردم شماری کرنی چاہئے۔ وزیر اعظم، آپ او بی سی کی توہین نہ کریں اور او بی سی کو دھوکہ نہ دیں۔
انہوں نے پارلیمنٹ کے تعلق سے کہا کہ جیسے ہی میں نے پارلیمنٹ میں مردم شماری کے معاملے کو اٹھانے کا آغاز کیا بی جے پی کے ممبران پارلیمان نے میری آواز کو دبانے کی کوشش کی۔ بی جے پی اور کانگریس کے درمیان ایک نظریاتی جنگ جاری ہے۔