عمرعبداللہ نے کہا : راہل کا دورہ پونچھ خوش آئند، اس مشکل گھڑی میں کچھ لوگ ہمارے ساتھ ہیں

کانگریس کے سابق صدر اور لوک سبھا میں اپوزیشن لیڈر راہل گاندھی آج(سنیچر) کو جموں کشمیر کے پونچھ علاقے کا دورہ کریں گے اور وہاں فوجی آپریشن کے دوران پاکستانی گولہ باری  کے متاثرین  سے ملاقات کریں گے۔
 جمعہ کو یہ اطلاع دیتے ہوئے کانگریس کمیونیکیشن ڈپارٹمنٹ کے انچارج جے رام رمیش نے کہا کہ  راہل گاندھی۲۴؍ مئی (سنیچر)کو جموں کشمیر کے پونچھ علاقے کے دورے پر ہوں گے اور اس دوران وہ پونچھ میں پاکستانی  گولہ باری کے متاثرین سے ملاقات کریں گے۔
 انہوں نے کہا ’’لوک سبھا میں  حزب اختلاف کے لیڈر  راہل گاندھی ۲۴؍ مئی کو پونچھ کا دورہ کریں گے، جہاں وہ پاکستان کی حالیہ گولہ باری سے متاثر ہوئے  افراد کے اہل خانہ سے ملاقات کریں گے۔ اس سے قبل، وہ پہلگام دہشت گردانہ حملے میں زخمی ہونے والوں اور کئی دیگر متعلقین سے ملنے کے لیے۲۵؍ اپریل کو سری نگر گئے تھے۔ انہوں نے اس وقت جموں کشمیر کے لیفٹیننٹ  گورنر منوج سنہا اور وزیراعلیٰ  عبداللہ سے بھی ملاقات کی تھی۔
وزیراعلیٰ عمر عبداللہ نے خیرمقدم کیا
 جموں وکشمیر کے وزیر اعلیٰ عمر عبداللہ نے کانگریس لیڈر راہل گاندھی کے پونچھ دورے کو خوش آئند قرار دیتے ہوئے کہا کہ اس سے لگتا ہے کہ اس مشکل گھڑی میں کچھ لوگ ہمارے ساتھ کھڑے ہیں۔ انہوں نے کہا کہ میں ترنمول کانگریس کا شکر گزار ہوں جنہوں نے سب سے پہلے جموں کشمیر میں گولہ باری سے متاثرہ لوگوں سے ملنے کا سلسلہ شروع کیا۔ راہل گاندھی کے اس دورے کے بارے  میں پوچھے جانے پر عمر عبداللہ نے جمعہ کے روز یہاں نامہ نگاروں کو بتایا: `یہ ایک اچھی بات ہے کہ وہ آ رہے ہیں اور لوگوں سے ملیں گے اور ان کے ساتھ اظہار ہمدردی کریں گے۔  سابق گورنر ستیہ پال ملک کے خلاف چارج شیٹ کے بارے میںذرائع ابلاغ کے نمائندوں کی جانب سے پوچھے جانے والے سوال پر وزیراعلیٰ  نے کہا: `اس پر میں کچھ بھی نہیں کہوں گا۔