بی جے پی لیڈر نتن بانکر نےبی ایم سی اور چڑیاگھرانتظامیہ کو خطوط بھیجے، کہا: چونکہ یہ پینگوئن ممبئی میں پیدا ہوئے ہیں اس لئے ان کے نام مقامی ہونے چاہئیں۔

ملک کی مالیاتی راجدھانی ان دنوں ایک عجیب و غریب بحث کی گواہ بن گئی ہے — وہ بھی پینگوئن کے ناموں پر! بائیکلہ میں واقع قدیم رانی باغ چڑیاگھر (ویرماتا جیجابائی بھوسلے چڑیا گھر) ملک کا واحد مقام ہے جہاں ہمبولٹ نسل کے پینگوئن موجود ہیں۔ یہاں ایک چھوٹا سا پینگوئن خاندان آباد ہے اور اب ان کے نام رکھنے کو لے کر سیاست ہو رہی ہے۔ مقامی بی جے پی لیڈر نتن بانکر نے مطالبہ کیا ہے کہ چونکہ ان میں سے کئی پینگوئن ممبئی میں پیدا ہوئے ہیں اس لئے ان کے نام مقامی یعنی مراٹھی ہونے چاہئیں۔ 
واضح رہے کہ ممبئی میونسپل کارپوریشن نے ممبئی کے چڑیا گھر کیلئے جولائی۲۰۱۶ء میں جنوبی کوریا کے سیول شہر میں واقع کوئکس ایکویریم سے ۸؍ ہمبولٹ پینگوئن منگوائے تھے۔ اس اقدام کا مقصد تھائی لینڈ کے مشہور سی لائف بنکاک اوشین ورلڈ جیسے مقامات کا مقابلہ کرنا تھا۔ 
ابتدائی طور پر ان۸؍ پینگوئن کے نام یہ رکھے گئے تھے :ڈونالڈ، ڈیزی، پوپوئے، اولیو، فلپر، ببل، مسٹر مولٹ اور ڈوری۔ وقت کے ساتھ ان پینگوئن نے جوڑے بنا لئے اور آج ان کی تعداد ۲۱؍ تک پہنچ چکی ہے۔ نتن بانکر نے بی ایم سی اور چڑیا گھر انتظامیہ کو خطوط بھیجے ہیں اور رانی باغ کے باہر ایک علامتی احتجاج بھی کیا۔ ان کا کہنا ہے کہ چونکہ یہ پینگوئن مہاراشٹر کی سرزمین پر پیدا ہوئے ہیں، اس لئے ان کے نام مقامی تہذیب و ثقافت کے مطابق ہونے چاہئیں۔ 
اس معاملے میں این سی پی (شرد پوار) کے قومی ترجمان، کارٹونسٹ اور طنز نگارکلائیڈ کرسٹو نےطنزیہ انداز میں بی جے پی سے پوچھا کہ یہ جان کر خوشی ہوئی کہ بی جے پی لیڈران کو اب اس بات کی فکر ہو گئی ہے کہ پینگوئن کے بچوں کو مراٹھی نام ملنے چاہئیں کیونکہ وہ مہاراشٹر کی دھرتی پر پیدا ہوئے لیکن ہمارا سوال یہ ہے کہ کیا بی جے پی کےوہ غیر مراٹھی لیڈران جو مہاراشٹر کے دھرتی پر پیدا ہوئے ہیں ، وہ مراٹھی نام اختیار کریں گے ؟