ٹیکہ کاری مراکز پر بھیڑ بھاڑ اور افرادی دوری پر عمل کرنے میں پیش آرہی دشواریوں کے بعد شہری انتظامیہ کا اپائنٹمنٹ لینے والوں کو ٹیکہ لگانے کا فیصلہ

 ممبئی اور تھانے میونسپل کارپوریشن نے شہریوں سے درخواست کی ہے کہ وہ کورونا سے تحفظ کا ٹیکہ لگانے کیلئے  موبائل ایپ’ کووِن ‘ پر اپنا اندراج کروائیں اور  اپائنٹمنٹ کے مطابق ہی متعلقہ مرکز پر جائیں۔ اپائنٹمنٹ کے مطابق ہی  ٹیکہ کاری کی جائے گی۔
 واضح رہے کہ ممبئی اور تھانے میں یکم مئی سے ۱۸؍ تا ۴۴؍ سال کے شہریوں کو بھی ٹیکہ دینے کا سلسلہ شروع کیا گیا ہے۔ ٹیکہ لگانے کیلئے شہری ٹیکہ کاری کے مراکز پر بھیڑ کر رہے ہیں جس کے سبب افرادی دوری برقرار رکھنے جیسے اصولوں پر عمل درآمدنہیں ہو پاتا ۔اس کے پیش نظر بھیڑ سے بچنے اور شہریوں کو کورونا سے تحفظ کا ٹیکہ لگانے  میں آسانی پیدا کرنے کیلئے ممبئی کے میونسپل کمشنر اقبال سنگھ چہل نے ’کوون ایپ‘ پر رجسٹرڈ شہریوں کو اپائنٹمنٹ  کے مطابق ہی ٹیکہ لگانے کی ہدایت دی ہے۔
 بی ایم سی کی حدود  میں۱۶؍ جنوری۲۰۲۱ء سے کووڈ سے بچاؤ کے ٹیکے  لگانے کا سلسلہ باقاعدگی سے شروع کیاگیاہے۔ ٹیکے کی   دستیابی کے مطابق لگ بھگ۱۴۷؍ مرکز قائم کئے  گئے ہیں۔تاہم  پچھلے کچھ دنوں میں مختلف ویکسینیشن مراکز میں بہت زیادہ بھیڑ ہو رہی  ہے۔ اس سے افرادی دوری جیسے  سے بچاؤ کے اقدامات کو صحیح طریقے سے نافذ کرنا مشکل ہوسکتا ہے۔اسی لئے  میونسپل انتظامیہ نے صرف ان لوگوں کو قطرے پلانے کا فیصلہ کیا ہے جنہیں ’ کوون ایپ یا ’کوون پورٹل‘ پر کامیابی کے ساتھ اندراج کے بعد `  اپائنٹمنٹ سلاٹ ملا ہے۔ اسی مناسبت سے  تمام متعلقہ افراد کو احکامات جاری کردیئے گئے ہیں کہ  اپائنٹمنٹ  لینے والے شہریو ں کو ہی ٹیکہ سینٹر  میںداخل ہونے دیں۔ ان مراکز میں ۴۵؍ سال اور اس سے زیادہ عمر کے شہریوں کو دوسرا ٹیکہ لینے ولاے شہریوںکو اسی صورت میں داخلہ ملے گا جب ان  کے پاس پہلے ٹیکے کی سند ہو گی۔
  تھانے میں بھی ٹیکہ کاری مہم میںتیزی لانے کے سلسلے میں جمعہ کو ٹی ایم سی کے صدر دفتر میں تھانےمئیر نریش مہسکے کی صدارت میں ایک جائزہ میٹنگ منعقد کی گئی جس میں یہ فیصلہ کیا گیا کہ ۶۰؍ سال اور اس سے زیادہ عمر کے شہریوں کیلئے  ممبئی کی طرز پر ’ڈرائیو ان‘ کا نظم کرنے اور ہاؤسنگ سوسائٹیز  اپنے مکینوں کی ٹیکہ کاری کیلئے نجی اسپتالوں میں ٹیکہ کاری کا نظم کرنے اور  ۱۸؍ تا ۴۴؍ سال  اور ۴۵؍  سال او راس سے زیادہ کے شہریوں کو ٹیکہ لگانے کیلئے بھی آن لائن رجسٹریشن لازمی قرار دینے کی ہدایت دی گئی ۔ البتہ جھوپڑ پٹیوں کے چند مراکز پر’ واک ان‘ طرز پر ٹیکہ کاری کرنے کی سہولت بھی فراہم کرنے کےلئے کہا گیا ہے۔ اس موقع پر میونسپل کمشنر ڈاکٹر وپن شرما کے علاوہ مختلف پارٹیوں کے گروپ لیڈراور افسران موجود تھے۔