مسافر بردار گاڑی گہری کھائی میں گرگئی۔ زخمیوں کو فوری طور پر اسپتال منتقل کیا گیاجن میں سے چند کی حالت نازک ہے۔

جموں کشمیر کے ضلع ڈوڈہ میں منگل کی صبح ایک مسافر بردار گاڑی گہری کھائی میں گرنے سے ۷؍ افراد ہلاک جبکہ۱۷؍افراد زخمی ہو گئے۔ ہلاک شدگان میں ایک خاتون اور ۵؍ سالہ بچی بھی شامل ہیں۔ مقامی انتظامیہ، پولیس اور امدادی کارکنوں نے فوری طور پر جائے حادثہ پر پہنچ کر بچاؤ کارروائیاں انجام دیں۔ حادثے پر لیفٹیننٹ گورنر منوج سنہا، وزیر اعلیٰ عمر عبداللہ اور ڈی پی اے پی صدر غلام نبی آزاد نے گہرے دکھ کا اظہار کیا ہے۔
 حکام کے مطابق یہ حادثہ صبح تقریباً۹؍ بجے ڈوڈہ-بھرت روڈ پر پونڈا کے مقام پر اُس وقت پیش آیا جب مسافر بردار گاڑی کا ڈرائیور ایک تنگ  موڑ پر کنٹرول کھو بیٹھا جس کے بعد گاڑی گہری کھائی میں جاگری۔ عینی شاہدین کا کہنا ہے کہ گاڑی میں گنجائش سے زیادہ مسافر سوار تھے۔
 انہوں نے کہا کہ ڈوڈہ کے گورنمنٹ میڈیکل کالج اسپتال میں ۵؍ افراد کو مردہ قرار دیا گیا جن کی بعد ازاں شناخت محمد اشرف، منگتا وانی، عطا محمد، طالب حسین اور رفیقہ بیگم کےطور پر کی گئی جبکہ ۵؍ سالہ اُزما جان اور شکور دین نے جموں کے اسپتال میں زخموں کی تاب نہ لاتے ہوئے دم توڑ دیا۔
 ریسکیو ٹیموں نے۱۷؍ زخمیوں کو فوری طور پر اسپتال منتقل کیاجن میں چند کی حالت نازک بتائی جا رہی ہے۔ ڈپٹی کمشنر ڈوڈہ ہروندر سنگھ نے بتایا کہ زخمیوں کے علاج کے لئے تمام ضروری سہولیات فراہم کی جا رہی ہیں اور حادثے کے بارے میں باضابطہ کارروائی شروع کی گئی ہے۔
 اس حادثے پر ایل جی منوج سنہا نے ایک تعزیتی پیغام میں کہا:’’ڈوڈہ میں المناک حادثے میں قیمتی جانوں کے ضیاع پر دلی دکھ ہوا۔ لواحقین سے تعزیت اور زخمیوں کی جلد صحتیابی کے لئے دعاگو ہوں۔‘‘جموں کشمیر کے وزیر اعلیٰ عمر عبداللہ نے ایکس پر کہا :’’انتظامیہ کو فوری امداد اور طبی سہولیات کی فراہمی کے احکامات دیئے گئے ہیں۔‘‘دریں اثناء مرکزی وزیر ڈاکٹر جتیندر سنگھ نے بھی حادثے پر افسوس کا اظہار کرتے ہوئے کہا کہ وہ ڈپٹی کمشنر سے مسلسل رابطے میں ہیں اور ہر ممکن مدد فراہم کی جا رہی ہے۔
 انتظامیہ کی جانب سے حادثے کی مکمل تحقیقات کا حکم دیا گیا ہے جبکہ مسافروں کی حفاظت کو یقینی بنانے کیلئے ٹریفک اور حفاظتی اقدامات پر زور دیا جا رہا ہے۔ ڈپٹی کمشنر نے زیادہ مسافر سوار کرنے والی گاڑیوں کیخلاف کارروائی کی یقین دہانی کرائی ہے۔