امریکی سفیر مائیک ہکابی نے امریکی شہری سیف اللہ مصلح کی غیر قانونی یہودی آباد کاروں کے ہاتھوں ہجومی تشدد کے ذریعے قتل کی تحقیقات کا مطالبہ کیا ہے۔

اسرائیل میں امریکی سفیر نے اسرائیلی حکام پر زور دیا ہے کہ وہ سیف مصلح کے قتل کی تحقیقات کریں، جو ایک۲۰؍ سالہ فلسطینی نژاد امریکی شہری تھا جسے مقبوضہ ویسٹ بینک میں غیر قانونی یہودی آباد کاروں کے ایک ہجوم نے سنگسار کر کے مار ڈالا۔ سفیر مائیک ہکابی نے منگل کو سوشل میڈیا پلیٹ فارم `ایکس پر پوسٹ کرتے ہوئے کہا، ’’میں نے اسرائیل سے سیف مصلح کے قتل کی فوری اور سخت تحقیقات کرنے کا مطالبہ کیا ہے، جو ایک امریکی شہری تھا اور سنجل میں اپنے خاندان سے ملنے آیا ہوا تھا جب اسے مارا گیا۔اس مجرمانہ اور دہشت گردانہ کارروائی کی جواب دہی ضروری ہے۔ سیف محض۲۰؍ سال کا تھا۔‘‘

یہ بھی پڑھئے: غزہ کی صورت حال ’’انتہائی سنگین‘‘: یورپی یونین کی خارجہ پالیسی سربراہ

واضح رہے کہ سیف مصلح، جو فلوریڈا، امریکہ کا شہری تھا، گذشتہ جمعہ کو سنجل قصبے میں رشتہ داروں سے ملنے آیا ہوا تھا جب اس پر مہلک حملہ ہوا۔اس کے خاندان کا کہنا ہے کہ غیر قانونی یہودی آباد کاروں نے اسے گھیر لیا، بری طرح مارا پیٹا، اور تقریباً تین گھنٹے تک ایمرجنسی میڈیکل ٹیموں کو اس تک پہنچنے سے روکے رکھا۔تاہم اسپتال پہنچائے جانے سے قبل ہی اس کی موت ہو گئی۔ کئی امریکی قانون سازوں نے افسوس کا اظہار کیا ہے اور محکمہ خارجہ پر زور دیا ہے کہ وہ اس واقعہ کی اپنی الگ سے تحقیقات شروع کرے۔یہ قتل مقبوضہ ویسٹ بینک میں اسرائیلی افواج اور غیر قانونی یہودی آباد کاروں کی جانب سے تشدد میں تیزی کے درمیان ہوا ہے۔