رومانیہ کے پراسیکیوٹرز نے سوشل میڈیا انفلوئنسر اندریو ٹیٹ کے خلاف نابالغوں کی ٹریفکنگ، منی لانڈرنگ، نابالغ سے جنسی تعلقات اور گواہوں کو دھمکانے سمیت تازہ الزامات میں فرد جرم عائد کی ہے۔

رومانیہ کے پراسیکیوٹرز نے سوشل میڈیا انفلوئنسر اندریو ٹیٹ کے خلاف نابالغوں کی ٹریفکنگ، منی لانڈرنگ، نابالغ سے جنسی تعلقات اور گواہوں کو دھمکانے سمیت تازہ الزامات میں فرد جرم عائد کی ہے، جبکہ ان کے بھائی ٹرسٹن ٹیٹ پر شریک جرم کا الزام عائد کیا گیا ہے۔ یہ فرد جرم دونوں بھائیوں کے خلاف برسوں کی تحقیقات کے بعد سامنے آئی ہے، جو سابق کک باکسر ہیں اور امریکی اور برطانوی شہریت رکھتے ہیں۔ واضح رہے کہ دونوں کو جولائی کے آخر میں میامی سے گرفتار کیا گیا تھا جب برطانیہ نے ان کی حوالگی کی درخواست کی تھی۔ تاہم انہوں نے تمام الزامات کی تردید کی ہے۔ 
رومانیہ کی انسداد منظم جرائم یونٹ ڈی آئی آئی سی او ٹی کے مطابق، بھائیوں نے مبینہ طور پر خواتین اور لڑکیوں کو رومانوی تعلقات یا شادی کا جھانسہ دے کر بھرتی کیا، اور پھر انہیں ویب کیم کاروبار کے لیے فحش مواد تیار کرنے پر مجبور کیا۔پراسیکیوٹرز کا کہنا ہے کہ ایک مبینہ متاثرہ لڑکی کی عمر۱۵؍ سال تھی جب اندریو ٹیٹ نے مبینہ طور پر۲۰۱۲ء میں برطانیہ میں اسے ورغلایا۔ انہوں نے الزام لگایا کہ اس کے بعد وہ اسے بخارسٹ لے گیا، جہاں مبینہ طور پر جسمانی تشدد اور نفسیاتی دھمکی کے ذریعے اس کا استحصال کیا گیا۔ 
 دوسری جانب ٹرسٹن ٹیٹ پر جسمانی جارحیت کے ذریعے مبینہ زیادتی میں معاونت کا الزام ہے۔ڈی آئی آئی سی او ٹی کا کہنا ہے کہ بھائیوں نے متاثرہ لڑکی کی ویڈیو چیٹ کمائی میں سے تقریباًسوا ملین ڈالر (جو اس کی آمدنی کا۸۰؍ فیصد تھی) اپنے پاس رکھے۔ پراسیکیوٹرز نے یہ بھی الزام لگایا کہ انہوں نے چار لگژری کاریں خرید کر اس رقم کو منی لانڈرنگ کرنے کی کوشش کی۔
تاہم ان دونوں بھائیوں کے رومانیہ کے وکیل یوجن ویدی نیک نے کہا کہ دفاع اس کیس کو چیلنج کرے گا۔ انہوں نے بیان میں کہا کہ ’’ہم (فرد جرم) کے ہر پہلو کو یکساں جانچ کے ساتھ پرکھیں گے اور مناسب عدالتی عمل کے ذریعے کسی بھی ثبوت، طریقہ کار یا قانونی خامی کو چیلنج کریں گے۔ہمارے مؤکل ان کے خلاف الزامات کو مسترد کرتے رہیں گے۔‘‘یاد رہے کہ ٹیٹ برادران اس وقت امریکی تحویل میں ہیں جبکہ ایک جج برطانیہ کی حوالگی کی درخواست (جو عصمت دری کے الزامات سے متعلق ہے) پر غور کر رہا ہے۔ یہ فوری طور پر واضح نہیں ہے کہ رومانیہ کے پراسیکیوٹرز انہیں امریکہ سے حوالگی کے لیے طلب کریں گے یا نہیں۔اگرچہ رومانیہ غیر حاضری میں مقدمات چلانے کی اجازت دیتا ہے، لیکن کارروائی فوری طور پر شروع نہیں ہوگی۔ ایک ابتدائی عدالتی چیمبر کو پہلے فرد جرم کا جائزہ لینا ہوگا اور اس بات کا تعین کرنا ہوگا کہ آیا ثبوت اور طریقہ کار قانون کے مطابق ہیں۔اس سے قبل بھائیوں پر رومانیہ میں انسانی اسمگلنگ کے الزامات میں فرد جرم عائد کی گئی تھی، لیکن ۲۰۲۴ء کے آخر میں ایک اپیل کورٹ نے کچھ ثبوتوں کو ناقابل قبول قرار دیتے ہوئے یہ مقدمہ پراسیکیوٹرز کو واپس بھیج دیا تھا۔اندریو ٹیٹ، جو خود کو خواتین سے نفرت کرنے والا (مائسوجنسٹ) قرار دیتا ہے، نے ایک شاندار اور انتہائی مردانہ آن لائن شخصیت کے ذریعے نوجوان لڑکوں میں بڑی مقبولیت حاصل کی ہے۔