سعودی وزارت برائے اسلامی امور نے منگل کو ایک سرکیولر جاری کیا جس میں رمضان المبارک سے قبل مساجد کیلئے ہدایات کا ایک نیا مجموعہ ترتیب دیا گیا ہے۔ اس کا مقصد رمضان المبارک کے دوران نظم و ضبط برقرار رکھنا اور نمازیوں کیلئے سہولیات کو بہتر بنانا ہے۔

سعودی عرب کے وزیر برائے اسلامی امور، دعوت و رہنمائی، شیخ عبداللطیف آل الشیخ نے تصدیق کی ہے کہ رمضان المبارک کے مقدس مہینے کے دوران مساجد کو نمازوں کے لئے بیرونی لاؤڈ اسپیکرز استعمال کرنے کی اجازت نہیں ہوگی۔ وزیرِ موصوف نے کہا کہ یہ پابندی رمضان میں برقرار رہے گی اور بیرونی لاؤڈ اسپیکرز کے استعمال کی اجازت صرف اذان اور اقامت کے لئے ہوگی۔

وزارت برائے اسلامی امور نے منگل کو ایک سرکیولر بھی جاری کیا جس میں رمضان المبارک سے قبل مساجد کے لئے ہدایات کا ایک نیا مجموعہ ترتیب دیا گیا ہے۔ اس کا مقصد رمضان المبارک کے دوران نظم و ضبط برقرار رکھنا اور نمازیوں کے لئے سہولیات کو بہتر بنانا ہے۔

یہ بھی پڑھئے: سعودی عرب: العلاء میں اونٹ کے قافلوں کے قدیم تجارتی راستے منظر عام پر

سرکیولر کے مطابق، مساجد کو ام القراء کیلنڈر کی بنیاد پر نماز کے سرکاری اوقات کی سختی سے پابندی کرنی ہوگی۔ مساجد کی انتظامیہ کو اس بات کو یقینی بنانا ہوگا کہ عشاء کی اذان مقررہ وقت پر دی جائے۔ وزارت نے ہر نماز کے لئے اذان اور اقامت کے درمیان مناسب وقت کے وقفے کی پابندی پر بھی زور دیا ہے۔

وزارت نے مزید ہدایت دی ہے کہ مساجد افطار کے کھانوں کا انتظام صرف مخصوص صحنوں میں کریں تاکہ صفائی کو یقینی بنایا جا سکے اور کسی بھی قسم کی خلل اندازی سے بچا جا سکے۔ اس کے علاوہ، پانی کے عطیات کو ذمہ داری سے سنبھالنے کی تاکید کی گئی ہے اور مساجد کے گودام میں ضرورت سے زیادہ مقدار ذخیرہ کرنے کے خلاف خبردار کیا گیا ہے۔

یہ بھی پڑھئے: سعودی عرب: حرمین شریفین کیلئے پہلی مذہبی ٹیکنالوجی ’’ہدایہ تھون‘‘ کا آغاز

وزارت برائے اسلامی امور نے مساجد کی انتظامی ٹیموں کو نگرانی بہتر بنانے اور دعائیہ مقامات کو صاف ستھرا، برقرار اور مکمل طور پر تیار رکھنے کی کوششیں تیز کرنے کی ہدایت دی ہے۔ وزارت نے مزید کہا ہے کہ خواتین کے نماز کے علاقوں کو مناسب طریقے سے لیس اور منظم کرنے پر خصوصی توجہ دی جائے۔ شیخ عبداللطیف آل الشیخ نے کہا ہے کہ ان کی وزارت مساجد کی مدد کرنے اور رمضان المبارک کے دوران نمازیوں کو ایک بہتر اور منظم ماحول فراہم کرنے کے لئے پرعزم ہے۔