وزارت حج اور عمرہ نے اعلان کیا ہے کہ عمرہ سیزن ۱۴۴۸؍ ہجری کے لیے عمرہ ویزوں کا اجرا ۳۱؍ مئی ۲۰۲۶ء سے شروع ہوگا، جبکہ بیرونِ ملک زائرین کی سعودی عرب آمد بھی اسی تاریخ سے ممکن ہوگی۔ وزارت کے مطابق یکم جون ۲۰۲۶ء سے زائرین Nusuk ایپ کے ذریعے مکہ مکرمہ میں داخلے اور عمرہ اجازت نامے حاصل کر سکیں گے۔

سعودی عرب کی وزارت حج و عمرہ نے عمرہ سیزن ۱۴۴۸؍ ہجری کے باضابطہ آغاز کا اعلان کرتے ہوئے کہا ہے کہ دنیا بھر کے زائرین کیلئے عمرہ ویزوں کا اجرا ۳۱؍ مئی ۲۰۲۶ء سے شروع ہوگا۔ اسی روز سے بیرونِ ملک عازمینِ عمرہ کی مملکت آمد کا سلسلہ بھی دوبارہ شروع ہو جائے گا۔ وزارت حج و عمرہ کی جانب سے جاری کردہ نئے آپریشنل کیلنڈر کے مطابق، یکم جون ۲۰۲۶ء سے زائرین Nusuk ایپ کے ذریعے عمرہ پرمٹ حاصل کر سکیں گے اور مکہ مکرمہ میں داخلے کی اجازت بھی اسی پلیٹ فارم کے ذریعے دی جائے گی۔ وزارت نے بتایا کہ یہ نیا کیلنڈر عمرہ خدمات کو زیادہ منظم، ڈجیٹل اور مؤثر بنانے کی وسیع حکمتِ عملی کا حصہ ہے۔ اس اقدام کا مقصد ویزا اجرا، زائرین کی آمد و رفت، رہائش، نقل و حمل اور سروس آپریشنز کو ایک مربوط نظام کے تحت لانا ہے تاکہ لاکھوں عازمین کو بہتر سہولیات فراہم کی جا سکیں۔

یہ بھی پڑھئے : فلسطین کا مسجدِ اقصیٰ کے قریب املاک پر قبضے کے اسرائیلی منصوبے کی مذمت

سرکاری شیڈول کے مطابق عمرہ ویزوں کے اجرا کی آخری تاریخ ۹؍ مارچ ۲۰۲۷ء مقرر کی گئی ہے، جبکہ غیر ملکی عازمین کیلئے سعودی عرب میں داخلے کی آخری تاریخ ۲۳؍ مارچ ۲۰۲۷ء ہوگی۔ اس کے بعد ۷؍ اپریل ۲۰۲۷ء کو تمام عمرہ زائرین کی مملکت سے روانگی کی آخری تاریخ مقرر کی گئی ہے۔ وزارت نے عمرہ کمپنیوں، ٹور آپریٹرز اور بیرونِ ملک ایجنٹس کو ہدایت کی ہے کہ وہ منظور شدہ نظام الاوقات اور قواعد و ضوابط پر مکمل عمل کریں تاکہ پورے سیزن کے دوران زائرین کو اعلیٰ معیار کی خدمات فراہم کی جا سکیں۔
گزشتہ چند برسوں میں سعودی عرب نے حج و عمرہ کے انتظامات میں بڑے پیمانے پر ڈجیٹل اصلاحات متعارف کروائی ہیں۔ Nusuk پلیٹ فارم انہی اصلاحات کا اہم حصہ ہے، جس کے ذریعے زائرین عمرہ اجازت نامے، ہوٹل بکنگ، ٹرانسپورٹ اور دیگر مذہبی خدمات تک رسائی حاصل کرتے ہیں۔ سعودی حکام کے مطابق اس ڈجیٹل نظام سے نہ صرف بھیڑ کے دباؤ کو بہتر انداز میں منظم کرنے میں مدد ملی ہے بلکہ سیکوریٹی، صحت اور زائرین کی سہولت میں بھی نمایاں بہتری آئی ہے۔ ماہرین کا کہنا ہے کہ سعودی عرب اب عمرہ اور حج کے شعبے کو وژن ۲۰۳۰ء کے تحت جدید مذہبی سیاحت کے ایک بڑے عالمی مرکز میں تبدیل کرنے پر کام کر رہا ہے۔ اسی حکمتِ عملی کے تحت ویزا پالیسی میں نرمی، ایئرپورٹس کی توسیع، تیز رفتار ٹرین منصوبے، اور اسمارٹ سروسز متعارف کرائی جا رہی ہیں۔

یہ بھی پڑھئے : متحدہ عرب امارات کا دمشق میں مسجد بنو امیہ کی بحالی کا اعلان

یاد رہے کہ ہر سال دنیا بھر سے کروڑوں مسلمان عمرہ کی ادائیگی کیلئے سعودی عرب کا سفر کرتے ہیں، جبکہ رمضان اور تعطیلات کے دوران زائرین کی تعداد میں غیر معمولی اضافہ دیکھا جاتا ہے۔ حکام کے مطابق نئے عمرہ سیزن میں بھی توقع ہے کہ مختلف ممالک سے لاکھوں عازمین مکہ مکرمہ اور مدینہ منورہ کا رخ کریں گے، جس کیلئے ابتدائی تیاریوں کا عمل شروع کر دیا گیا ہے۔