روسی وزیر خارجہ نے کہاکہ امریکہ اور اس کے اتحادی عالمی حالات کا سہارا لےکردنیا پراپنے اصول تھوپنے کی کوشش کررہے ہیں۔

روس کے وزیر خارجہ سرگئی لاؤروف نےترکی کے اس شہر میں ایک تقریب کے دوران عالمی حالات کا بہانہ بنا کردنیا پراپنے اصول مسلط کرنے کی امریکہ اور مغربی ممالک کی ذہنیت کو تنقید کا نشانہ بنایا۔ روسی وزیر خارجہ نے یہاں انطالیہ ڈپلومیسی فورم میں شرکت کی اورترکی کے صدر رجب طیب اردگان کی تعریف کی۔ 
اس موقع پر انہوں نے کہا کہ انطالیہ ڈپلومیسی فورم علم ِ سیاسیات کا ایک نیا فارمیٹ ہے جسے صدر رجب طیب اردگان نے شروع کروایا ہے۔ انطالیہ ڈپلومیسی فورم (اے ڈی ایف) میں شرکت کے بعد پریس کانفرنس سے خطاب میں وزیر خارجہ لاؤروف نے کہا ’’یہ فورم، ترکی کے صدر رجب طیب اردگان کی طرف سے شروع کروایا گیا، علومِ سیاسیات کا نسبتاً نیا فارمیٹ ہے۔ فورم میں حکومتی سربراہان سمیت۱۰۰؍سے زائد ممالک کی نمائندگی کی گئی ہے۔ وزرائے خارجہ کی سطح پر بھی اجلاس میں قابل ذکر نمائندگی رہی ہے۔ ‘‘
 لاؤروف نے کہا کہ ’’اس موقع سے استفادہ کرتے ہوئے میں اس مہمان نوازی اور پُر تپاک استقبال پر ترکی کے اپنے ہم منصب حکمرانوں کا شکریہ بھی ادا کرنا چاہتا ہوں۔ میں نے فورم کے دائرہ کار میں اس طرف توجہ مبذول کروائی ہے کہ امریکہ کی زیر قیادت پورا مغرب تمام عالمی حکومتوں کے مساوی حق خودمختاری کے اُصول کی اور اقوام متحدہ کے اُصول و ضوابط کی کھلی خلاف ورزی کر رہا ہے۔ مغرب، دنیا پر اپنے اُصول تھوپنے کے لئے، موجودہ بین الاقوامی صورتحال کو استعمال کر رہا ہے۔ ‘‘
 روسی وزیر خارجہ نے کہا کہ’’میں امید کرتا ہوں کہ فورم کے مذاکرات مفید ثابت ہوں گے۔ صدر اردگان کے خطاب والی نشست اور دیگر پینلثں میں دنیا کی موجودہ صورتحال اور ہم سب کی بین الاقوامی ذمہ داریوں پر نظر ثانی کی ضرورت پر زور دیا گیا ہے۔ ‘‘