Updated: May 06, 2026, 9:06 PM IST
| Cape Town
جنوبی افریقہ میں ایک لاپتہ تاجر کی تلاش اس وقت خوفناک موڑ اختیار کر گئی جب پولیس نے دریائے کوماتی سے ایک ۱۵؍ فٹ لمبا مگرمچھ پکڑ کر اس کے پیٹ سے انسانی باقیات برآمد کیں۔ حکام کو شبہ ہے کہ باقیات ۵۹؍ سالہ گیبرئیل بٹسٹا کی ہو سکتی ہیں، جو سیلابی پانی میں بہہ جانے کے بعد لاپتہ ہو گئے تھے۔ ڈی این اے تجزیے کے ذریعے شناخت کی تصدیق کا انتظار ہے۔ خطرناک ریسکیو آپریشن میں ہیلی کاپٹر، ڈرونز اور رسیوں کا استعمال کیا گیا، جبکہ مگرمچھ کو آپریشن کے دوران مار دیا گیا۔
جنوبی افریقہ سے تعلق رکھنے والے ایک لاپتہ تاجر کے کیس نے سوشل میڈیا اور عالمی میڈیا میں شدید توجہ حاصل کر لی، جب پولیس نے ایک بڑے مگرمچھ کے پیٹ سے انسانی باقیات برآمد ہونے کا انکشاف کیا۔ جنوبی افریقی پولیس سروس کے مطابق، دریائے کوماتی میں ایک ’’انتہائی خطرناک اور پیچیدہ آپریشن‘‘ کے دوران حکام نے ایک مگرمچھ کو بازیافت کیا، جس کے اندر انسانی باقیات موجود تھیں۔ پولیس کے مطابق، اس کارروائی کی قیادت کیپٹن جوہان ’’پوٹی‘‘ پوٹگیٹر نے کی۔ آپریشن میں پولیس نے ہیلی کاپٹر، رسیوں اور خصوصی ٹیموں کی مدد لی کیونکہ مگرمچھوں سے بھرے دریا میں کارروائی انتہائی خطرناک تصور کی جا رہی تھی۔
بی بی سی کی رپورٹ کے مطابق، مگرمچھ تقریباً ۱۵؍ فٹ لمبا تھا اور اس کا وزن ۱۱۰۰؍ پونڈ سے زیادہ تھا۔ اسے بعد میں کروگر نیشنل پارک منتقل کیا گیا، جہاں جانچ کے دوران اس کے نظامِ انہضام سے انسانی باقیات برآمد ہوئیں۔ حکام کو شبہ ہے کہ یہ باقیات ۵۹؍ سالہ گیبرئیل بٹسٹا کی ہو سکتی ہیں، جو گزشتہ ہفتے لاپتہ ہو گئے تھے۔ مقامی ادارے نیوز ون کے مطابق، پولیس کئی دنوں سے ان کی تلاش میں مصروف تھی۔ ایس اے بی سی نیوز کے مطابق، مپومالنگا صوبائی پولیس کے ترجمان کرنل ماویلا ماسونڈو نے بتایا کہ بٹسٹا کی گاڑی ایک پل عبور کرنے کی کوشش کے دوران سیلابی پانی میں پھنس گئی تھی۔ جب پولیس جائے وقوعہ پر پہنچی تو گاڑی موجود تھی لیکن تاجر لاپتہ تھا۔
اس کے بعد پولیس نے ڈرونز، ہیلی کاپٹروں اور زمینی ٹیموں کی مدد سے وسیع سرچ آپریشن شروع کیا۔ تلاش کے دوران اہلکار ایک ایسے جزیرے تک پہنچے جہاں کئی مگرمچھ موجود تھے۔ کیپٹن پوٹگیٹر نے مقامی میڈیا نیوز ۲۴؍ کو بتایا کہ ایک مگرمچھ غیر معمولی طور پر ’’بھرا ہوا‘‘ دکھائی دے رہا تھا۔ ان کے مطابق، ہیلی کاپٹر اور ڈرون کے شور کے باوجود مگرمچھ کا رویہ غیر معمولی تھا اور اس کا پیٹ واضح طور پر پھولا ہوا محسوس ہو رہا تھا۔ بعد ازاں اسی مگرمچھ کو نشانہ بنا کر ہلاک کیا گیا تاکہ اس کی جانچ کی جا سکے۔ پولیس کی جانب سے جاری فوٹیج میں دیکھا جا سکتا ہے کہ ایک رسی ہیلی کاپٹر سے نیچے اتاری گئی جبکہ اہلکار خطرناک حالات میں مگرمچھ کو محفوظ طریقے سے باہر نکال رہے ہیں۔
پولیس کی پریس ریلیز میں کہا گیا کہ کیپٹن پوٹگیٹر نے ’’انتہائی خطرناک حالات میں غیر معمولی بہادری کا مظاہرہ کیا۔‘‘ قائم مقام نیشنل کمشنر لیفٹیننٹ جنرل پلینگ ڈمپنے نے تصدیق کی کہ برآمد ہونے والے جسمانی اعضا کو ڈی این اے تجزیے کے لیے بھیج دیا گیا ہے تاکہ میت کی شناخت کی باضابطہ تصدیق ہو سکے۔ انہوں نے کہا کہ ’’باقیات کی دریافت کے بعد پولیس نے مگرمچھ کی آنتوں سے ملنے والے جسمانی اعضا ڈی این اے تجزیے کے لیے حاصل کر لیے ہیں تاکہ شناخت کی تصدیق کی جا سکے۔‘‘ یہ واقعہ جنوبی افریقہ میں سیلابی موسم، جنگلی حیات کے خطرات اور لاپتہ افراد کے پیچیدہ سرچ آپریشنز کے حوالے سے شدید بحث کا باعث بن گیا ہے۔
