پبلک سیکٹر کے سب سے بڑے قرض فراہم کرنے والے ادارے اسٹیٹ بینک آف انڈیا (ایس بی آئی) نے ہاؤسنگ اور ذاتی قرض لینے والے صارفین کو بڑی راحت دیتے ہوئے شرحِ سود میں۲۵؍ بیسس پوائنٹس (۰ء۲۵؍ فیصد) تخفیف کا اعلان کیا ہے۔ شرح میں یہ تخفیف۱۵؍ دسمبر سے نافذ العمل ہو جائے گی۔بینک کی پریس ریلیز میں بتایا گیا ہے کہ اس نے بیرونی بینچ مارک پر مبنی شرح (ای بی ایل آر) میں۲۵؍ بیسس پوائنٹس کی کمی کی ہے۔ یہ شرح موجودہ۸ء۱۵؍ فیصد سے گھٹ کر پیر سے۷ء۹۰؍ فیصد ہو جائے گی۔ ای بی ایل آر وہ شرح ہے، جو فلوٹنگ ریٹ پر لئے گئے ہر قرض کی شرحِ سود کا تعین کرتی ہے۔ زیادہ تر ہاؤسنگ قرض، ذاتی قرض اور چھوٹے کاروباری اداروں کو دیئے گئے قرضوں کی شرحِ سود اسی بنیاد پر مقرر کی جاتی ہے۔ایس بی آئی نے یہ کمی ریزرو بینک آف انڈیا (آر بی آئی) کی جانب سے۵؍ دسمبر کو ریپو ریٹ میں کی گئی۲۵؍ بیسس پوائنٹس کی کمی کے بعد کی ہے۔مرکزی بینک نے اس سال چوتھی مرتبہ ریپو ریٹ میں کمی کی ہے۔ اس دوران ریپو ریٹ میں مجموعی طور پر۱ء۲۵؍ فیصد کمی ہوئی ہے۔آر بی آئی کے گورنر سنجے ملہوترا نے۹؍ دسمبر کو بینکوں کے اعلیٰ حکام کے ساتھ اجلاس میں ریپو ریٹ میں کمی کا فائدہ صارفین تک پہنچانے کی ہدایت دی تھی۔

ایس بی آئی نے تمام مدتوں کے لئے مارجنل کاسٹ آف فنڈز پر مبنی قرض شرحوں میں ۵؍بیسس پوائنٹس اور بیس ریٹ میں۱۰؍ بیسس پوائنٹس کی تخفیف کا اعلان کیا ہے۔ بینک نے بتایا ہے کہ اب بیس ریٹ ۱۰؍ فیصد سے گھٹ کر۹ء۹۰؍ فیصد ہو گیا ہے۔ اس کے ساتھ ہی فکسڈ ڈپازٹس پر صارفین کو دی جانے والی سود کی شرح زیادہ تر مدت کے لئے بدستور برقرار رہے گی۔ صرف دو برس یا اس سے زیادہ اور تین برس سے کم مدت کے لئے شرحِ سود۶ء۴۵؍ فیصد سے گھٹا کر۶ء۴۰؍ فیصد کر دی گئی ہے۔ بزرگ شہریوں کو اب اسی مدت کے ڈپازٹ پر۶ء۹۵؍ فیصد کے بجائے۶ء۹۰؍ فیصد سود ملے گا۔اس کے علاوہ امرت ورشٹھ اسکیم کے تحت بزرگ شہریوں کے لئے۴۴۴؍ دنوں کی مدت کے لئے شرح سود۶ء۶۰؍ فیصد سے کم کرکے ۶ء۴۵؍ فیصد کر دی گئی ہے۔