بھکو چوک پر سماجی کارکنان اور انصاف پسند شہری جمع ہو کر بم دھماکہ فیصلے کے خلاف اپیل کا مطالبہ کریں گے، شہر میں سخت پولیس بندوبست

  جمعرات کو مالیگاؤں بلاسٹ کیس ۲۰۰۸ء کے ملزمین کو عدالت نے بَری کر دیا۔ اس کے بعد جمعہ کا دن صنعتی شہر میں بخیر گزرا۔ یاد رہے کہ بھگوا ملزمین کو بری کئے جانے کی خوشی میںشہر کے کیمپ روڈ پر واقع گاندھی مجسمے کے پاس بی جے پی ، آر ایس ایس ، وشو ہندوپریشد، بجرنگ دَل اور شیوسینا( شندے) کے کارکنان نے مٹھائیاں تقسیم کیں ۔ شادیانے بجائے ۔ آتش بازی کی اور گھنٹوں تک ناچتے گاتے  رہے ۔ ان عوامل کے سبب پولیس نے خفیہ محکمے کو پوری طرح مستعد کردیا تھا ۔ جمعہ کی مناسبت سے اضافی پولیس فورس کا اہتمام ایڈیشنل ایس پی سندھو کی سربراہی میں کیا گیا ۔
  مالیگاؤں کے بڑے بازار میں واقع جامع مسجد کے اطراف پولیس سیکوریٹی کے سخت انتظامات تھے ۔ شہر کی کئی اہم مسجدوں اور خصوصا ًقبرستانوں کے اطراف پولیس اہلکاروں کی ڈیوٹیاں لگائی گئی تھیں ۔ علاقائی پولیس تھانوں میں بھی حفاظتی انتظامات سے متعلق ہدایتیں پولیس ہیڈ کوارٹر سے جاری کی گئیں ۔ مجموعی طور سے جمعے کا دن پُر امن رہا ۔ پولیس اور سرکاری انتظامیہ نے اطمینان کا سانس لیا ۔  
لوک سنگھرش سمیتی کا مظاہرہ 
 سادھوی پرگیہ سنگھ ٹھاکر سمیت دیگر ملزمین کو مالیگاؤں بلاسٹ  ۲۰۰۸ء کے مقدمے سے بَری کئےجانے سے مالیگاؤں کے باشندوں میں مایوسی   ہے ۔ حصولِ انصاف کی جدوجہد جاری رکھنے کے مقصد سے آج سنیچر کو سہ پہر ۳؍ تاشام ۶؍بجے تک مظاہرہ کیا جائے گا ۔ اس سلسلے میں سمیتی کے کنوینر لقمان انیس اور معتمد عمومی سلیم عرف ایکّا نے کہا کہ مظاہرہ  جمعہ کے دن طے تھا لیکن قانونی اجازت نامے کی دستیابی میں درکار وقت کو ملحوظ رکھتے ہوئے سمیتی نے سنیچر ۲؍ اگست کو مظاہرہ کرنے کا فیصلہ کیا ۔ انصاف کی جنگ لڑنے والی تنظیموں ، حقوقِ انسانی  کے کارکنان  اور انصاف پسند شہریوں سے اس مظاہرہ  میں شرکت کی گزارش کی گئی ہے ۔