اناؤ عصمت دری معاملے میں ہائی کورٹ کے فیصلے پر روک لگانے کے سپریم کورٹ کے فیصلے کا کانگریس نے خیر مقدم کیا ہے۔

اناؤ عصمت دری معاملے میں ہائی کورٹ کے فیصلے پر روک لگانے کے سپریم کورٹ کے فیصلے کا کانگریس نے خیر مقدم کیا ہے۔ پارٹی نے اسے متاثرہ اور اس کے ساتھ کھڑے ہونے والوں کی جیت قرار دیا۔ مہیلا کانگریس کی صدر الکا لامبا نے پیر کو یہاں نامہ نگاروں سے کہا کہ ’’آج سپریم کورٹ کے فیصلے نے ہائی کورٹ کے اس فیصلے پر روک لگا دی ہے، جس میں کلدیپ سنگھ سینگر کو ضمانت دی گئی تھی۔ سپریم کورٹ کے فیصلے سے یہ واضح ہوگیا ہے کہ نابالغ کی عصمت دری اور اس کے کنبہ کے افراد کے قتل کا مجرم  بی جے پی کا سابق ایم ایل اے کلدیپ سنگھ سینگر جیل سے باہر نہیں آئے گا۔ یہ متاثرہ، اس کے اہل خانہ اور اس کے ساتھ کھڑی ہر آواز کی جیت ہے لیکن یہ لڑائی ابھی ختم نہیں ہوئی ہے۔‘‘
 انہوں نے وزیر اعظم مودی پر بھی حملہ کیا اور کہا کہ وہ کہتے تھے کہ نابالغوں کی عصمت دری کرنے والوں کو جرم ثابت ہوتے ہی پھانسی پر لٹکا دیا جائے گا، لیکن سب نے دیکھ لیا کہ اس گھناونے فعل کے مرتکب  مجرموں کو کس طرح تحفظ فراہم کیا جارہا ہے۔ کلدیپ سینگر کا معاملہ اب سپریم کورٹ پہنچ گیا ہے۔ کلدیپ سنگھ سینگرہوں، انکیتا بھنڈاری کے مجرم ہوں یا بلقیس بانو کے،  مودی حکومت ہر معاملے میں بے نقاب ہوئی ہے۔ آج انصاف کی جیت ہوئی ہے، لیکن یہ لڑائی انصاف کی فراہمی تک جاری رہے گی۔ 
 الکا لامبا نے کہا کہ جب کلدیپ سنگھ سینگر کو ضمانت ملی تو متاثرہ اپنی ماں کے ساتھ انڈیا گیٹ پر احتجاج پر بیٹھی تھی۔ افسوس کی بات ہے کہ  بی جے پی اور اس کے حامیوں نے اس کا مذاق اڑایا۔ کلدیپ سنگھ سینگر کو ضمانت ملی کیونکہ سی بی آئی نے کمزور لڑائی لڑی۔ انہوں نے کہا کہ ان سب کے درمیان کانگریس  پارلیمانی پارٹی کی لیڈر سونیا گاندھی اور پارٹی لیڈر راہل گاندھی نے اپنے گھروں کے دروازے کھولے اور متاثرہ لڑکی اور اس کے خاندان کو یقین دلایا کہ جب تک انہیں انصاف نہیں مل جاتا وہ ان کے ساتھ کھڑے رہیں گے۔ ہم نے یہ لڑائی قانونی طور پر لڑنے کے ساتھ ہی سڑکوں پر بھی جدوجہد کی۔
 الکا لامبا نے مطالبہ کرتے ہوئے کہا کہ بیٹیوں کے مجرموں کی رہائی اور پیرول پر چھوڑنے کا تماشہ ختم ہونا چاہئےبلکہ انہیں سزائے موت دی جانی چاہئے۔ انہوں نے کہا کہ پارٹی ملک کی مظلوم بیٹیوں کو انصاف ملنے تک ان کے ساتھ کھڑی رہے گی۔ خیال رہے کہ ان دنوں سینگر کے علاوہ رام رحیم اور آشا رام جیسے مجرمین بھی بار بار پیرول پر باہر آتے رہے ہیں۔