ان میں وہ قیدی بھی شامل ہیںجنہوں نے جرائم کی واردات انجام دینے کیلئےکبھی خود ماسک کا استعمال کیاتھا

تمل ناڈو کی جیل میں بند کچھ قیدیوں نے جرائم کے واقعات کو انجام دیتے وقت اپنی شناخت چھپانے کے لیے ماسک کا استعمال کیا تھا، لیکن اب وہ جیل میں بند دیگر قیدیوں کے ساتھ مل کر پولیس محکمہ اور عوام کے لیے ماسک بنانے میں مصروف ہیں۔ 
 جیل انتظامیہ کے افسران کے مطابق ریاست کی جیلوں میں روزانہ تقریباً۲۳۰۰۰؍ ماسک کی سلائی ہو رہی ہے۔بتایا جاتا ہے کہ جیسے ہی پولیس اہلکاروں کو چہرہ پر باندھنے کیلئے ماسک کی کمی کا سامنا کرنا پڑا۔ جیلوں میں سلائی کرنے والی یونٹوں کو ماسک بنانے کے لیے کہا گیا۔
 جیل کے ذرائع کے مطابق ہر ماسک کی قیمت تقریباً۱۰؍ روپے  ہے۔ یہ مقامی استعمال  کے لیے ہے جب کہ ماسک فراہمی کے لیے اسپتال و دیگر شعبوں سے رابطہ قائم کیا گیا ہے۔ اگر انھیں ضرورت پڑے گی تو تمل ناڈو جیل کے قیدی اضافی ماسک تیار کریں گے۔
 اس درمیان جیل انتظامیہ نے جیلوں میں کورونا وائرس کے پھیلاؤ کو روکنے کے لیے ایک نیا طریقہ اختیار کیا ہے۔ جیل انتظامیہ نے نئے قیدیوں کو رکھنے کے لیے ہر ضلع میں۳۷؍ ذیلی   جیلوں کو نشان زد کیا ہے۔ یہاں رکھ کر پہلے لوگوں کی جانچ کی جائے گی اور وائرس انفیکشن کی علامت والے لوگوں کو نزدیکی سرکاری اسپتال میں بھیجا جائے گا۔ بتایا جاتا ہے کہ نئے قیدیوں کے لیے مختص جیلوں میں انھیں منتقل کر دیا گیا ہے۔
 واضح رہےکہ کورونا وبا سے لڑائی کیلئےہر کوئی اپنی اپنی سطح  پرسرگرم ہے۔ اس لڑائی میںجیلوں میں قید قیدی بھی شامل ہیں۔ اس سے قبل بکسر کی جیل میںقیدیوں کے ذریعے ماسک تیار کئے جانے کی خبریں آچکی ہیں۔