پیٹنٹ کی خلاف ورزی کے الزام میں یو ایس آئی ٹی سی نے پابندی لگائی تھی ، ایپل کوکورٹ سے راحت ملی۔

ایپل کی جدید اسمارٹ واچ کی امریکہ میں  فروخت جاری رہے گی۔ ایپل نے ’بلڈ آکسیجن فیچر‘  کے پیٹنٹ خلاف ورزی کےمعاملے میں  ’یو ایس کورٹ آف اپیل‘ میں  منگل کو ایک ہنگامی اپیل داخل کی تھی۔ جس میں  ایپل اسمارٹ واچ کو امریکہ میں امپورٹ کرنے پر عائد کی گئی پابندی کو ہٹانے کی گزارش کی گئی تھی جسے کورٹ نے قبول کرلیا ہے۔ اس سے قبل بائیڈن انتظامیہ نے امریکی انٹرنیشنل ٹریڈ کمیشن (آئی ٹی سی) کے فیصلے کو بدلنے سے انکارکردیا تھا۔
معاملہ کیا ہے؟
 میڈیکل ٹیکنالوجی کمپنی ماسیمو نے ایپل پر الزام لگایا ہے کہ اس نے ماسیمو کےملازمین کو کام پر رکھا، اسکی پلس آکسیمٹری ٹیکنالوجی چرائی اور اسے ایپل واچ میں شامل کیا ۔ ۲۰۲۰ء میں ایپل نے اپنی سیریز ۶؍ ماڈل کی اسمارٹ واچ میں  پہلی بار پلس آکسی میٹر فیچر دیا تھا۔ ۲۰۲۰ء میں  ماسیمو نے ایپل کے خلاف تجارتی راز کی چوری اور پیٹنٹ  خلاف ورزی پر کیس دائر کیا تھا۔ ماسیمو کا الزام ہے کہ ایپل نے واچ سیریز ۶؍ کے لانچ کے دوران اس کے ۱۰؍ پلس آکسی میٹر پیٹنٹ کی خلاف ورزی کی تھی۔ اس پر کورٹ نے ماسیمو کے حق میں  فیصلہ سنایا تھا۔اکتوبر ۲۰۲۳ء  میں  امریکی انٹرنیشنل ٹریڈ کمیشن (آئی ٹی سی ) نے کورٹ کے فیصلے کو برقرار رکھا اور فیصلہ سنایا کہ ایپل نے ماسیمو کے پیٹنٹ میں  سے ایک کی خلاف ورزی کی ہے، واچ میں  استعمال کئے جارہے بلڈ آکسیجن سینسر کے پیٹنٹ ماسیمو کے پاس ہیں ، اسلئے ایپل ان ماڈل کو نہیں فروخت کرسکتا۔