کیتھولک چرچ کے روحانی پیشوا پوپ فرانسس نے اس بات پر افسوس کا اظہار کیا ہے کہ پیغمبر حضرت عیسیٰؑ کے امن کے پیغام کو ان کی پیدائش کی سر زمین پر جنگ کی لاحاصل منطق کے ذریعے غارت کیا جا رہا ہے۔

کیتھولک چرچ کے روحانی پیشوا پوپ فرانسس نے اس بات پر افسوس کا اظہار کیا ہے کہ پیغمبر حضرت عیسیٰؑ کے امن کے پیغام کو ان کی پیدائش کی سر زمین پر جنگ کی لاحاصل منطق کے ذریعے غارت کیا جا رہا ہے۔ کرسمس کے موقع پر ویٹی کن کے سینٹ پیٹرز باسیلیکا میں منعقدہ اجتماع سے جس میں ۶؍ ہزار سے زائد افراد شریک تھے، خطاب کرتے ہوئے پوپ نے کہا کہ’’  ہمارے دل بیت اللحم میں ہیں جہاں ’امن کے شہزادہ‘  کے پیغام کوایک بار پھر  لا حاصل جنگ  اورہتھیاروں کے تصادم سے مسترد کر دیا گیا ہے۔ پوپ  نے جنگوں  کےدوران کرسمس سادگی سے منانے کی اپیل کی ۔پوپ فرانسس کا بیان ایسے وقت میں سامنے آیا ہے جب ۷؍ اکتوبر کے بعد سےحماس اور اسرائیل کے درمیان  جاری جنگ میں غزہ کے محصور علاقے میں ہلاکتوں کی تعداد میں اضافہ ہوتا جا ریا ہے۔یہ کہتے ہوئے کہ کرسمس کا اصل پیغام محبت ہے ، پوپ نے لوگوں سے اپیل کی کہ وہ دنیا کی کامیابی کو اصل کامیابی نہ سمجھیں اور صارفیت کےاسیر ہو کر نہ رہ جائیں۔ اس موقع پر پوپ فرانسس نے کرسمس سادگی سے منانے کی اپیل کی۔اس موقع پر پوپ فرانسس نے کہا کہ انصاف طاقت سے نہیں بلکہ محبت سے آتا ہے اور ہماری دھڑکنیں بیت اللحم کے ساتھ ہیں۔پوپ فرانسس  نے کہا ہم فلسطین ، اسرائیل اور یوکرین کی جنگ سے متاثر ہونے والوں کے ساتھ ہیں۔یاد رہے کہ اسرائیلی جارحیت کے باعث حضرت عیسیٰؑ کی جائے پیدائش بیت اللحم میں کرسمس کی تقریبا ت منسوخ کردی گئی ہیں ۔عیسائی برادری کا کہنا ہے کہ کوئی بھی جشن منانے کو تیار نہیں، ان کے دلوں میں خوشی منانے کی کوئی خواہش باقی نہیں۔مسیحی برادری بیت اللحم کو حضرت عیسیٰؑ کی جائے پیدائش قرار دیتی ہے اور ہر سال یہاں کرسمس کا بہت بڑا جشن منایا جاتا ہے جس میں دنیا بھر سے سیاح بھی شریک ہوتے ہیں لیکن اس سال فلسطین میں بسنے والے عیسائی بھی غزہ میں اسرائیل کی وحشیانہ دہشت گردی پر درد اوررنج میں مبتلا ہیں۔ مقبوضہ بیت المقدس میں گرجا گھروں کے سربراہان نے غزہ پٹی میں اسرائیلی بمباری اور محاصرے کا سامنا کرنے والے فلسطینیوں کے ساتھ یکجہتی کا اظہار کیلئے کرسمس کی تقریبات سادگی سے منانے پر زور دیا ہے۔