سونم وانگ چک نے یاد دلایا کہ طلبہ پر ایف آئی آر درج نہ کرنے کے تحریری وعدہ کا حکومت احترام کرے، کیجریوال نے بھی ویڈیو جاری کیا ا ور کہا ’’ ایک طرف چین کی ترقی کا یہ عالم ہےکہ وہ مصنوعی سورج بنارہا ہے،دوسری طرف ملک کے حالات ایسے ہیںکہ یہاںبچوں پر ایف آئی آر ہورہی ہے ‘‘

موسمیاتی کارکن سونم وانگ چک نے پارلیمنٹ میں عوامی امتحانات (ترمیمی) بل کو متعارف کرانے کا خیرمقدم کیا اور امید ظاہر کی کہ یہ ملک کے تعلیمی نظام میں بڑی اصلاحات کا باعث بنے گا۔ انہوں نے حکومت سے بھی اپیل کی کہ وہ حالیہ مظاہروں میں ملوث طلباء کے خلاف کوئی قانونی کارروائی نہ کرنے کے اپنے تحریری وعدے کو پورا کرے۔جمعرات کو سوشل میڈیا پلیٹ فارم ایکس پر لداخ کے اپنے سفر کی ایک ویڈیو شیئر کرتے ہوئے وانگ چک نے کہا کہ انہوں نے دہلی سے سری نگر کا سفر وندے بھارت ٹرین سے کیا۔ماحولیاتی کارکن نے دہلی سری نگر کے سفر کو، بشمول چناب ریل پل کو عبور کرنے کو ایک خوبصورت تجربہ قرار دیا۔ وانگ چک نے کہا کہ مجھے ہندوستانی ریلوے پر بہت فخر ہے۔ انہوں نے مزید کہا کہ وہ اور ان کی ٹیم لداخ جانے سے پہلے کشمیر میں ایک دن گزاریں گے۔امتحانی نظام کو مضبوط بنانے کے مقصد سے حال ہی میں پارلیمنٹ میں پیش کیے گئے ایک بل کا حوالہ دیتے ہوئے، وانگ چک نے کہا کہ انہیں خوشی ہے کہ امتحانی نظام میں اصلاحات کیلئے پارلیمنٹ میں ایک بل پیش کیا گیا ہے۔وانگ چک نے کہا کہ مجھے امید ہے کہ اصلاحات نہ صرف امتحانات میں بلکہ تعلیم میں بھی ہوں گی۔وانگ چک نے احتجاج ختم ہونے کے بعد حکومت سے اپنے اور کاکروچ جنتا پارٹی (سی جے پی) سے کیے گئے وعدوں کو پورا کرنے کی اپیل بھی کی۔
 انہوں نے کہا میں حکومت سے اپیل کرنا چاہتا ہوں کہ وہ جنتر منتر پراحتجاج کرنے والے طلبہ کے خلاف کوئی قانونی کارروائی نہ کرنے اور ایف آئی آر درج نہ کرنے کے حوالے سے میرے اور پھر سی جے پی کے ساتھ کیے گئے تحریری معاہدوں کا احترام کرے اور ملک میں خاص طور پر نوجوان نسل میں اعتماد کی فضا پیدا کرے۔
 وانگ چک نے کہا کہ حکومت اور نوجوانوں کے درمیان باہمی اعتماد ایک عظیم ملک اور عظیم ہندوستان کی تعمیر کے لیے ضروری ہے۔ یہ اپیل سی جے پی کے حکومت سے بار بار کے مطالبات کے درمیان سامنے آئی ہے تاکہ اس بات کو یقینی بنایا جائے کہ عوامی امتحانات میں مبینہ بے ضابطگیوں پر ملک گیر احتجاج میں شامل طلباء اور مظاہرین کے خلاف کوئی مجرمانہ مقدمہ درج نہ کیا جائے۔سی جے پی نے حکومت سے تحریری یقین دہانی کا بھی مطالبہ کیا ہے کہ مظاہرین کے خلاف تمام زیر التوا مقدمات واپس لے لیے جائیں گے۔ انہوں نے خبردار کیا ہے کہ اگر یہ وعدے پورے نہ ہوئے تو وہ دوبارہ احتجاج شروع کر سکتے ہیں۔
اروندکیجریوال کا مودی حکومت پر حملہ 
 عام آدمی پارٹی (اے اے پی/آپ) کے قومی کنوینر اور دہلی کے سابق وزیر اعلیٰ اروند کیجریوال نے وزیر اعظم مودی اور مرکزی حکومت پر سخت حملہ کیا۔ سوشل میڈیا پلیٹ فارم ایکس پر جاری ایک ویڈیو میں انہوں نے کہا کہ ایک طرف چین مصنوعی سورج بنا رہا ہے تو دوسری طرف ہمارے ملک کے وزیر اعظم سوشل میڈیا پر ان کا  مذا ق  بنانے والے بچوں کے خلاف ایف آئی آر درج کرا رہے ہیں۔
 کیجریوال نے الزام لگایا کہ سوشل میڈیا پر وزیر اعظم کا مذاق اڑانے والے طلبہ کے خلاف ایف آئی آر درج کی جا رہی ہے۔ ایکس پر جاری کئےگئے ویڈیو میں انہوں نے کہا کہ چین کی ترقی کا یہ عالم ہےکہ وہ مصنوعی سورج جیسی مستقبل کی ٹیکنالوجی تیار کرنے میں مصروف ہے جبکہ ہندوستانی حکومت ترقی کے بجائے ایسے مسائل میں الجھی ہوئی ہے۔ کیجریوال نے کہا کہ ٹائمس آف انڈیا کی رپورٹ کے مطابق چین نیوکلیئر فیوژن ٹیکنالوجی پر مبنی ایک مصنوعی سورج بنا رہا ہے جو لامحدود اور صاف توانائی پیدا کرے گا۔ انہوں نے دعویٰ کیا کہ یہ منصوبہ۲۰۳۰ءتک مکمل ہوسکتا ہے۔ اس کے برعکس، انہوں نے کہا کہ ہندوستان کو اب بھی سڑکوں، پلوں اور بنیادی ڈھانچے کے مسائل کا سامنا ہے۔ حکومت  اراکین پارلیمنٹ اور اراکین اسمبلی کو خریدنے اور ووٹ حاصل کرنے میں مصروف  ہے۔کیجریوال نے کہاکہ ہندوستان کو ایسی قیادت کی ضرورت ہے جو مستقبل کی سوچ رکھنے والی ہو اور جو سائنس ،ٹیکنالوجی ، تعلیم اور انفراسٹرکچر کو ترقی دے کرملک کو آگے بڑھائے ۔