یکم محرم الحرام سے کپاس واڑی قبرستان (لنک روڈ ) تدفین کے لئے کھولنے کا معاملہ پھر ٹل گیا ۔ اب عاشورہ کے بعد ۳۰؍ جون کو اسے کھولا جائے گا۔ قبرستان کے نگراں نے اس کی وجہ یہ بتائی کہ وضو خانہ اور نماز جنازہ کی ادائیگی کے لئے شیڈ بنانا باقی ہے۔ واضح ہوکہ اس تعلق سے متعد دمرتبہ بات چیت کی گئی تھی اورجامعہ اشرفیہ قادریہ ایجوکیشنل ٹرسٹ کے سربراہ مولانا سید معین الدین اشرف عرف معین میاں نےکہا تھا کہ کام پورا ہوگیا ہے،یکم محرم سے تدفین شروع کردی جائے گی مگر ایسا نہ ہوسکا۔ابھی مقامی لوگوں کو ۱۳،  ۱۴؍ دن مزیدانتظار کرنا ہوگا۔ 

کپاس واڑی قبرستان کے نگراں عبدالرزاق چونا والا نے نمائندۂ انقلاب سے بات چیت کرتےہوئے کہاکہ’’کام توپورا ہوگیا ہے مگر نماز جنازہ ادا کرنے کےلئے شیڈ بنانا ہے اوروضو خانہ کا انتظام کرنا ہے، اس کام میںچند دن لگیں گے اسی لئے یہ طے کیا گیا ہےکہ انشاء اللہ ۳۰؍جون سے شروع کردیا جائے گا،مزیدتاخیر نہیں ہوگی۔‘‘  انہو ںنےیہ بھی کہاکہ ’’ یکم محرم الحرام سے تدفین کا عمل شروع ہوجاتا مگر مزدوروں کی عدم دستیابی کےسبب کام میں تاخیر ہوئی ، اسی لئے اب نئی تاریخ طے کی گئی ہے،اس سے قبل کام پورا ہوجائے گا ۔ ‘‘ ان  کےمطابق ’’ قبرستان میں میت کی تدفین کےساتھ دیگر ضروری چیزیں موجود رہناضروری ہے تاکہ کسی قسم کی دشواری نہ ہو ۔‘‘