پی آر اونےکہا: اس سلسلے میں ریاستی حکومت کے فیصلے کے مطابق عمل کیا جائے گا،ویسے پوری تیاری سے لوکل ٹرینیں پہلے سے ہی چلائی جارہی ہیں

 شہرمیں کورونا کے معاملات میں خاطر خواہ کمی کے باوجود لوکل ٹرینوں میں عام مسافروں کو سفر کی اجازت ابھی تک نہیں دی گئی ہے اور نہ ہی اس بات کا اعلان کیا گیا ہے کہ انہیں یہ اجازت کب تک دی جاسکتی ہے۔ ریلوے نے پہلے کی طرح پھر اسے ریاست کا معاملہ بتاکر گیند  ریاستی حکومت کے پالے میں ڈال دی ہے اور موجودہ حالات کے سبب فیصلہ ریاستی حکومت پر چھوڑا ہے۔ اس لئے ممبئی واسیوں کو لوکل ٹرینوں میں سفر کیلئے ابھی مزید انتظار کرنا ہوگا۔ حالات میں تیزی سے آنے والی بہتری اور کووڈ کیسز میں‌کمی کے سبب  یہ امید کی جارہی تھی کہ شاید عنقریب یہ بتادیا جائے کو فلاں تاریخ سے عام مسافر لوکل ٹرینوں میں دوبارہ  پہلے کی طرح سفر کرسکیں گے لیکن اب بھی کچھ نہیں کہا جاسکتا۔ذمہ دار اور حالات پر نگاہ رکھنے والے شہریوں کا کہنا ہے کہ جب تک لوکل ٹرین خدمات پوری طرح بحال نہیں‌ ہوں گی اس وقت تک نہ تو کاروبار قاعدے سے شروع ہو گا اور نہ ہی شہر کا مضافات سے مکمل رابطہ بحال ہوسکے گا۔
 سینٹرل ریلوے کے چیف پی آر او شیواجی ستار  اور ویسٹرن ریلوے کے چیف پی آر او سمیت ٹھاکور نے صحت عامہ کو ریاست کا‌ معاملہ قرار دے کر اس سلسلے میں کوئی واضح جواب دینے سے انکار کیاہے۔ ساتھ ہی یہ بھی دہرایا کہ کووڈ وباء کے اس دور میں صحت عامہ اور سوشل ڈسٹنسنگ کا خیال رکھتے ہوئے ریاستی حکومت نے محض لازمی خدمات پر مامور عملہ کو ہی ٹرینوں میں سفر کی اجازت دی ہے۔ اس لئے عام مسافروں کو کب اجازت دی جائے گی، فی الوقت  ریلوے کے پاس اس کا واضح جواب نہیں ہے بلکہ اس کا جواب ریاستی حکومت ہی دے سکتی ہے۔ ویسے ریلوے نے اپنی تیاری پہلے سے ہی پوری کر لی ہے اور تمام احتیاطی تدابیر کو اپناتے ہوئے لوکل خدمات مہیا کروائی جا رہی ہیں۔‌ریلوے انتظامیہ کا یہ بھی کہنا ہے کہ عام مسافروں کیلئےلوکل ٹرین چلانے کے لئے بھیڑ بھاڑ پر قابو پانا سب سے اہم مسئلہ ہے ۔اس سلسلے میں جہاں تک ریاستی حکومت کا معاملہ ہے تو شہری انتظامیہ کی جانب سے کووڈ کیسز میںکمی کا اعتراف تو کیا گیا ہے لیکن خطرہ برقرار رہنے کا اندیشہ ظاہر کرتے ہوئے پابندی برقرار رکھنے کا فیصلہ کیا گیا ہے۔اس کی وضاحت بی ایم سی کمشنر اقبال سنگھ چہل نے کی ہے۔ ان غیر یقینی حالات سے یہ واضح ہوجاتا ہے کہ ممبئی واسیوں کو ابھی کچھ وقت تک لوکل ٹرینوں کے بجائے دیگر ذرائع سفر سے ہی کسی صورت اپنی منزل تک پہنچنا ہوگا۔یہ الگ بات ہے کہ دیگر ذرائع پوری طرح سے ناکافی ثابت ہورہے ہیں۔