تمغہ ہارنے کے بعد مودی نے فون پر گفتگو کی، حوصلہ نہ ہارنے کی تلقین
EPAPER
Updated: August 07, 2021, 2:39 AM IST | New Delhi
تمغہ ہارنے کے بعد مودی نے فون پر گفتگو کی، حوصلہ نہ ہارنے کی تلقین
ہندوستانی خواتین ہاکی ٹیم جمعہ کو حالانکہ کانسے کے تمغے کیلئے ہونے والا میچ بھی سخت مقابلے کے بعد ہار گئی مگر اس نے ہندوستانیوں کا دل جیت لیا ہے۔ جمعہ کو میچ ہارنے کے بعد ٹیم کی ہر کھلاڑی جذباتی ہوگئی، کئی تو میدان میں ہی رو پڑیں تاہم ملک میں ان کی واپسی پر ان کے خیر مقدم کی تیاریاں ہورہی ہیں۔ اس بیچ وزیراعظم نریندر مودی نے خود فون پر ویمنس ہاکی ٹیم کی کھلاڑیوں سے بات چیت کی۔
جمعہ کے مقابلے کے بعد صدر جمہوریہ رام ناتھ کووند نے خواتین ہاکی ٹیم کی پزیرائی کرتے ہوئے ٹویٹ کیا ہے کہ’’میدان میں ویمنس ہاکی ٹیم نے بہترین کھیل کا مظاہرہ کیا اور ہر ہندوستانی کا دل جیت لیا۔ ہمیں آپ پر فخر ہے۔‘‘ سرکاری ذرائع کے مطابق وزیراعظم نے جب فون کر کے ٹیم کی اراکین سے گفتگو کی تو وہ پھوٹ پھوٹ کر روپڑیں مگر وزیراعظم نے انہیں حوصلہ نہ ہارنے کی تلقین کی اور کہا کہ انہیں اپنی کارکردگی پر فخر ہونا چاہئے کیونکہ انہوں نے کوارٹر فائنل میں تین بار کی عالمی چمپئن ٹیم کو صفر ایک سے شکست دی ہے۔ ‘‘ انہوں نے کہا کہ ’’ملک ٹوکیو۲۰۲۱ء میں اپنی خواتین ہاکی ٹیم کی کارکردگی کو ہمیشہ یاد رکھے گا جنہوں نے بہترین کھیل کا مظاہرہ کیا۔‘‘ وزیراعظم کے مطابق’’ہم بھلے ہی تمغہ نہ جیت سکے ہوں مگر یہ ٹیم نئے ہندوستان کی نمائندگی کرتی ہے۔‘‘ عوامی سطح پر بھی خواتین ہاکی ٹیم کے بارے میں زبردست جوش وخروش پایا جارہاہےجنہوں نے نہ صرف یہ کہ سیمی فائنل میں پہنچ کر تاریخ رقم کی بلکہ اپنے قومی کھیل کے تعلق سے ملک کے عوام میں نیا جوش بھی بھر دیاہے۔